Lafaek News—Komunidade aldeia Cailuru Suku Tutuala postu Tutuala munisipiu Lautém, João Maria de Jesus, informa ba Lafaek News, kinta 24/04/2025, katak ba da-daun balada sira iha tutuala moris felizidade iha ambiente hakmatek tanba ema kasador sira ladun ona.
“Governu desloka ona guarda floresta iha munisípiu, liu-liu iha área remotas sira, entaun ema kasa ilegál ne’e hahú menus ba bebeik, tanba gurada floresta hahú kontroladu no tau matan ba ambiente iha Ai-laran, dala ruma ema kasa subar, maibé atu kasa rame-rame hanesan uluk ne’e ita nunka hare’e, tanba atividade kasa ilegal ne’e komesa menus, no guarda floresta sira kaer kona ema kasa animal fuik sira, sira prende kilat, manu sira ne’ebé mak ema uza ba kasa, entaun komunidade sira hahú tauk ona oho balda fuik sira,” João de Jesus ba Jornalista sira iha nia rezidensia Tutuala, munisípiu Lautém, Kinta (24/04/2025).
Nune’e mos iha sorin seluk reprezentante Diretor Guarda Floresta Munisípiu Lautém, Euzebio Freitas de Jesus, haktuir guarda floresta hala’o kontrola iha munisipio Lautem, maibe labele kotrola ho másimu tanba grupu kasa ilegal mai ho kroat.
“Ami guarda floresta mak fó protesaun ba ai-laran no manu-fuik sira, ami proteze animal ki’ik to animal rusa no lafaek sira ne’e, maibé manu ida kakatua no loriku ne’e, originál Timor nian maibé atu mohu ona, ami mesak labele fó protesaun tanba kilat manu ne’e makas, ami mós menus equipamentus, ami foti kilat manu ida, maibé ema hatama mai ne’e barak nafatin, animal originál Timor ninian ne’e barak, maibé atu hotu tanba de’it kilat ema kasa animal fuik ne’e makas iha area ne’e, tanba Lautem ne’e luan tebes-tebes”nia afirma
Aliende ne’e Xefe Aldeia Pitileti, Tito Martins reforsa, nia parte sei diskonfia kasa ilegal, maibé governu sensibliza ona lei tarabandu komunidade konsumu ona lei ne’e kasa ilegal ladun ona.
“Governu sensibilza ona lei tarabandu iha ami nia suku Tutuala, bainhira ema kaer ita tenki hetan sansaun, entaun sira rona ida ne’e, sira hahú tauk ona, kona-bá kasa ilegal ne’e iha ami nian Tutuala ne’e menus ona,” Tito relata.
Enkuantu lei area protezidu númeru 5/2016 ko’alia klaru ema ne’ebe kasa animal fuik iha ailaran bainhira identifika sei hetan sansaun koima husi $500 to’o $ 5000 no pena prizaun tinan 3, iha kódigu penal artigu 216 kona-ba krime hasoru aihoris no balada fuik sira no iha artigu 215 ko’alia kona-ba krime hasoru ambiente.
Jornalista : Maria José
