Lafaek News- Uniaun Europeia no UNICEF entrega projetór 52, UPS 52 no flesh 52 ba Ministériu Edukasaun Juventude no Desportu (MEJD) hodi tulun fasilidade ensinu nian iha territóriu nasionál.
Ministru Edukasaun Juventude no Desportu Armindo Maia hateten, Uniaun Europeia (EU) no Unicef ohin entrega ona ekipamentu ba MEJD hanesan projetor 52 UPS 52 no Fles 52 projetu no asesoria sira ne’ebé sei fó ba eskola limanulu (50) iha territoriu nasionál hodi tulun fasilidade ensinu nian no atividade kurrikular nune’e bele kria konsiénsia no halo prevensaun violensia hasoru labarik sira liu-liu feto no labarik sira.
“MEJD simu ona ekipamentu sira ne’ebé fo ajuda tebes hodi fahe rekursu importante sira ba estudante no profesor sira hanesan, halo diskusaun no halakon violensia iha eskola, aumenta tan uma ba komunidade sira,” dehan MEJD Armindo Maia, ba jornalista sira iha Salaun Edukasaun Vila-Verde Dili, kinta, (12/08/2021).
Governante ne’e akresenta, Ministériu Edukasaun Juventude no Desportu halo ona esforsu maka’as no bebeik atu hamenus violénsia sira ne’ebé hasoru feto no labarik sira iha eskola hotu, iha territoriu laran tomak atu nune’e labarik sira hotu bele sente kontente no seguru iha sira nia eskola.
“MEJD halo ona esforsu maka’as no bebeik atu hamenus violensia sira iha eskola hotu iha territoriu tomak tamba ita hakarak labarik hotu sente seguru iha Nia eskola bainhira labarik sira sente kontente no seguru iha nia eskola,” informa Armindo Maia.
Entretantu Ministériu Edukasaun Juventude no Desportu apresia tebes ba Uniaun Europeia (UE) ne’ebé reprezenta iha Timor-Leste ba apoiu tomak hodi hadia di’ak liu tan kualidade edukasaun iha Timor-leste no esforsu tomak ne’ebé direita no indiretamente hamutuk ho nasaun unidas hodi kombate hasoru feto no labarik feto sira.
Iha fatin hanesan, Embaixadór Uniaun Europeia (UE), Andrew Jacobs hatutan, violensia kontra feto no labarik feto sira ida-nee estraga ona sira nia moris ho ida ne’e presiza hapara ona liu husi fornese projetu no ekipamentu sira seluk, inisiativa ne’e sei ajuda eskola 50 hodi responde ba kestaun sira ne’e.
“Ida-ne’e sei ajuda sira hodi realiza katak violénsia ne’e la aseitavel no atu adopta hahalok apropriadu iha sirkulasaun hotu-hotu ajuda atu kombate estereotipu jéneru nian no ba foinsa’e sira nia abilidade moris nian ne’ebé presiza atu hetan susesu iha sosiedade ohin loron,”informa Embaixadór UE Andrew Jacobs.
Jornalista : Sonia de Almeida
Asisten Editora : Juvita dos Santos
