Lafaek News–Prezidente Repúblika Francisco Guterres Lú Olo ho kompleta ona Vasina Astrazeneca doze daruak nian, husu povu Timor Leste, hakbesik an ba postu vasinasaun sira hodi bele simu Vasina hasa’e imunidade kontra pandemia COVID-19.
“Liuhusi vasina ida ne’e, atu hodi hasa’e ita-nia imunidade, hodi proteje ita-nia isin, ita-nia saúde, proteje mós ita-nia familia sira en jeral proteje mós ita-nia komunidade sira tomak”, deklara, Prezidente Repúblika Francisco Guterres Lú Olo iha palásiu prezidensiál Bairo-Pite, sesta hafoin simu Vasina.
Xefe estadu ne’e afirma, corona ida ne’e oho ona ema barak iha mundu, inklui Timor-Leste ne’ebé rejista ema na’in 26 mate ona ba Covid, ho razaun ida ne’e bele lori povu atu ba seguransa saúde nian, seguransa atu hetan imunidade di’ak liután ba sira-nia saúde no ba sira-nia família.
“Liu husi vasina segundu doze ne’e hodi bele fó mós ba ita-nia povu tomak bele ba simu vasina iha periodu ida ne’e, ita hatete ba ita-nia povu liu husi ha’u rasik ne’ebé ohin atu simu segundu doze atu hatete, ba ita-nia povu atu hot-hotu bele ba simu vasina ida ne’e,” katak Lú Olo.
Iha fatin hanesan Diretora Jerál Ministra Saúde Odete Maria Freita Afirma, ‘Ohin eventu importante, tanba Prezidente Repúblika hetan ona Vasina 2 doze Astrazeneca nian, tuir tempu ne’ebe determina kalendariu depois de simu vasina primeira doze 8 semana depois Prezidente Repúblika ho nia espoza ohin simu kompleta ona segunda doze.
Prezidente Repúblika ho nia espoza hatudu ezemplu ba iha nasaun no populasaun katak, hahu husi ulun boot sira no ba ema hotu-hotu tenke partisipa iha Vasina ne’e atu bele proteje an.
“Agradese ekipa saúde disponibiliza an mai iha fati ida ne’e hansan orariu ida ne’ebe mak estabelesidu antes ohin ami mai kumpre 2 doze ne’ebe akompañia mos husi Ministra Saúde,” Odete deklara.
Dadus ne’ebe mak Ekipa saúde sira simu husi funsionario iha palasio Presidente Republika nia total Primeira doze nia atus rua resin, númeru ne’e sei la priense ohin, aban bainrua hakbesik an ba postu Vasinasaun ne’ebe iha.
Timor Leste konsege atinje ona ema rihun 333 mak simu ona vasina astrazenca iha primera doze no ba segunda doze nian 50 mil resin.
Jornalista : Rita Moniz
Editor : Agapito de Deus
