Lafaek News—Prezidente Repúblika José Ramos-Horta, hatete Relasaun Timor-Leste ho Korea metin loos espera governu, povu Korea kontente relasaun ho Timor aumenta no buka hakat ba investimentu hodi kontribui ba dezenvolvimentu kontribui ba empregu Timor Leste.
Prezidente Repúblika, José Ramos-Horta, hato’o asuntu ne’e bainhira partisipa iha komemorasaun loron nasionál Korea nian ne’ebé hala’o iha Otél Timor no mós tinan 20 relasaun diplomátika entre Timor-Leste no Coreia do Sul .
Xefe Estadu, José Ramos-Horta hateten, relasaun bilateral entre Seul no Díli bele aposta ba kooperasaun ekonómika.
“Relasaun entre rai rua, Timor-Leste ho Korea metin loos, di’ak no ha’u espera hanesan governu iha Korea, povu iha Korea sira mós kontente relasaun ho Timor, no ha’u espera katak, relasaun ne’e sei aumenta, no ba oin ita bele buka hakat ba investimentu para sira bele loke fábrika ruma iha ne’e, kontribui ba Timor nia dezenvolvimentu kontribui ba empregu iha rai laran,” hateten Prezidente José Ramos-Horta iha Otél Timor ( Kuarta 09/11/2022).
Tuir Xefe Estadu Horta, relasaun bilateral entre nasaun rua sei sólida, tanba Timor-Leste no Korreia iha história ne’ebé hanesan no sofre invazaun oi-oin, maibé interessadu los atu apoia Timor-Leste.
“Ha’u fi’ar, tanba ohin kalan mós ema kompañia boot mós mai, primeiru kompañia boot iha Korea mak mai, ha’u iha esperansa ké sei aumenta liu-tán relasaun ho Korea-do-súl, ita-nia joven sira mós kontente estuda língua Koreanu, ha’u espera ké sei bele kontinua ba Korea ba futuru, tanba povu Korea haree istória Timor nian hanesan sira-nian,” katak PR Horta.
Entretantu, partisipa iha serimónia refere, membru governu, kórpus diplomátikus no mós Kargus Xefia husi liña ministériu, prezidente husi ajénsia autónomas sira, reprezentante husi autoridade defeza no seguransa no seluk tan, serimónia ne’e, taka ho aprezentasaun kanta múzika tuir kultura Korea nian, aprezentasaun husi grupu Taekwondo Timoroan sira, nomos dansa kulturál suru-boek husi grupu Lejiaval.
Jornalista : Rita Moniz
Editór : Agapito de Deus
