Ermera (Lafaeknews)-Diretór Saúde Munisípiu Ermera, António de Deus Fátima, informa liuhosi amostra ne’ebé mak ekipa saúde Munisípiu Ermera foti, pesoál na’in-27 detetadu pozitivu Covid-19, tanba ne’e na’in-13 asegura ona iha fatin izolamentu estádiu munisipal, maibé pesoál na’in-14 lakohi kopera ekipa vizilánsia, nune’e to’o agora sei subar-an hela iha komunidade nia leet.
Nia informa, pesoál sira ne’ebé mak lakohi kopera hodi tama izolamentu ne’e hosi Postu Administrativu Hatulia B na’in-tolu, Hatulia A na’in-rua, Letefoho na’in-lima, Atsabe na’in-rua no Gleno na’in-rua.
Estádiu Munisipál Ermera nakfilak ba sala Izolamentu Covid-19 iha kapitál Gleno-Ermera. Foto LN : Floriano Soares.
“Problema fundamentu ne’ebé mak ami hasoru no sai dezafiu boot mak ne’e. Bainhira sira mai hosi Dili ita foti swab ba sira, i ita foti sira-nia diresaun, exemplu! Rezista sira nia identidade hanesan hosi Aldeia, Suku, Postu Administrativu no mós sira-nia númeru telemóvel, mais depois detetadu katak sira pozitivu. Entaun sira-nia númeru telemóvel hamate hotu kedan,” Afirma António ba lafaeknews.com iha fatin izolamentu, Estádiu Munisipál Gleno, Domingu, (11/04/2021).
Nia dehan, agora provizóriu na’in-13 mak tama ona fatin izolamentu no hela tan na’in-14 mak seidauk, maibé ekipa vizilánsia kontinua esforsu para iha loron ida ka rua nia laran ne’e tenke foti hotu vítima hirak ne’e hodi tama hotu iha fatin izolamentu. Atu nune’e iha tempu badak bele halo teste swab ba família sira ne’ebé mak durante ne’e sira kontak besik.
“To’o agora ami seidauk hatene sira-nia paradeiru loloos, maibé ami kontaktu ona autoridade lokál sira atu nune’e bele kopera ba malu ho ekipa taksfor, atu nune’e ita bele foti lalais sira,” dehan nia.
Nia afirma, ekipa saúde kontaktu ona Administradór Postu, Xefe Suku no xefe Aldeia sira hodi servisu hamutuk ho OPS sira para bele buka nafatin sira, para iha loron rua ka tolu nia laran ne’e tenke tama hotu ona izplamentu atu nune’e moras aat ne’e labele alastra ba ema seluk iha suku ne’ebé mak sira hela ba.
Nia esplika, pesoal na’in-27 ne’e ho asinomátiku, signifika la aprezenta sintomas, maibé sira pozitivu, tanba ne’e fasíl liu halo tranzmisaun ba fatin ne’ebé mak sira hela ba, tanba ne’e mak ekipa saúde esforsu nafatin para sira ne’e bele tama izolamentu hodi bele halo kontak resin ba família sira.
Tuir nia dehan, pesoál sira ne’e la kopera ekipa saúde, tanba laiha konxiénsia katak bainhira sira la kopera sei fó impaktu para halo tranzisaun lokál iha munisípiu Ermera.
“Maibé hakarak dehan de’it katak, ami-nia ekipa ne’e kompoin hosi autoridade hotu inklui PNTL no F-FDTL tanba ne’e ami sei buka tuir nafatin sira ne’ebé sei subar hela para bele tama hotu iha fatin izolamentu,” tenik nia.
Aleinde ne’e mós nia informa katak, ekipa saúde Munisípiu Ermera simu ona aimoruk vasinasaun AstraZeneka iha Sábadu horseik, tanba ne’e sei halo lansamentu ba vasinasaun iha Munisípiu Ermera sei hahú iha Kurta-Feira (14/04).
“Nia alvu baliu instituisaun ho nia funsionáriu sira. Signifika primeira faze ne’e ba ita nia autoridade ho nia funsionáriu uluk, depois segundu faze mak ba ita nia komunidade sira,” nia afirma.
