Lafaek News–Xefe suku Kaikoli Hipólito Marques Sarmento, hirus hodi dehan governu la rona povu nia halerik tanba hadau malu kadeira, maske xefe suku iha kraik servisu maka’as hafanu bei-beik governu liu husi proposta hakerek kona-ba sofrementu inundasaun ne’ebé povu kiik hasoru iha kraik, laiha ema ida resposta.
Hipólito hateten nia parte lori komunidade nia naran hatoo ona pedidu ba parte relevante no ko’alia bei-beik iha media hanesan, jornal no televizaun maibé estadu ho governu seidauk toma medida ba povu nia preokupasaun.
Kada tinan kaikoli sempre mosu inundasaun Governu la Sente maibe ami lideransa suku ho komunidade sira sente hela terus husi inundasaun, tanba Komunidade kaikoli maioria enfrenta ba inundasaun kuaze 95% ka da tinan,” dehan Xefe suku Kaikoli Iha edifísiu administraun munisipal Dili, kuarta 29/03/2022.
Xefe suku Kaikoli ne’e relata, kada tinan bee sempre sae iha Kaikoli relasiona ho udan boot horiseik kuaze oras ida ka rua nia laran mosu inundasaun komunidade nia sasán barak mak hetan estragus inklui sasán eletrónika balun sorte ema lakon vida laiha.
Ha’u husu ba governu labele hadau malu de’it podér no labele hadau malu de’it mak kadeira, maibé rona mos ami xefe suku sira nia lian tanba ami mak hela ho komunidade la’os maun boot sira mak hamutuk ho komunidade,” Hipolito akresenta.
Labele estraga povu nia votu, maibé rona lideransa suku nia lian no tau didi’ak populasaun nia votu ne’e hodi responde saida mak durante ne’e komunidade sira infrenta no terus ba bei-beik.
Ha’u nia rekomendasaun ba oitavu governu ukun aan tinan 20 resin ona governu ida sae ida tun, maibé nafatin de’it tempu to’o, mai promete sira nia kompremisiu, maibé sira la haree kona-ba akontesimentu ne’ebé durante ne’e sempre mosu iha Dili laran liu-liu suku kaikoli nian,” nia deklara.
Hipólito, labele planu de’it atu halo dreinajen, maibé planu uluk saida mak presiza halo uluk iha Dili-laran atu bee labele nalihun no evita inundasaun iha kapital nasaun nian.
Tuir dadus ne’ebé Lafaek News asesu total populasaun kuaze 6000 resin no komunidade ne’ebé sai vítima ba inundasaun hamutuk porsentu 95.
Jornalista :Orlando Magno
Editor : Agapito de Deus
