Lafaeknews – Komunidade Tasi tolu iha área Lagoa-1 ho Lagoa-2, no Masin-Lidun Aldeia 12 de Outubru, postu administrativu Dom Aleixo, Munisípiu Dili, agora dadaun tenke selu Bero, hodi bele asesu, sosa sasan iha merkadu terminal Tasi-Tolu, tanba bee nakonu iha Lagoa refere, difikulta tebes sira nia movimentu hodi ba sosa sasan iha loja Terminal Tasi-Tolu nian
Afonso da Costa, ne’ebé loron rua ona tula komunidade husi área Masin-lidun no foho hun nian, hodi asesu ba merkadu tanba to’o agora bee sa’e nakonu iha dalan diresaun husi terminal ba Masin-Lidun Tasi Tolu nian
“ Ha’u loron rua ona fasilita sira (komunidade) ho bero, horseik kalan, ami ajuda sira, ho bero ida hodi tula sira ho sasan husi Danau satu hodi mai uma adat maka sira foin bele ba sosa modo no presiza seluk iha merkadu Terminal Tasi-Tolu,” dehan, Afonso, ba Lafaek News iha Tasi Tolu hafoin tula motor ho beru husi Masin-Lidun hodi ba hatun iha uma adat Tasi- Tolu, Ters-feira,(06042021)
Afonso hatete, Bero ne’e ne’ebé iha só iha ida de’it la sufsiente atu tula komunidade sira, tanba se tula ema barak liu, entaun bero ne’e bele sai aat, entaun haruka komunidade sira tenke selu hodi bele halo manutensaun ba ro ne’ebé tula komunidade sira husi lagoa sorin no rai hun Tasi Tolu nian mai iha besik uma adat nian
“ohin ami husu sira selu ema ida 2 dolar husi uma adat ba iha danau satu ho danau dua, motor entau selu 10 dolar atu la selu maibé tanba ami hola mina ba bero no ro horikalan kuak, entaun ami tenke husu sira selu atu ami bele hola mina no kuak ami bele hadi’a fali atu kontinua tula sira mai asesu husi lagoa ida no lagoa 2 nian para bele asesu ba kompras sasan iha merkadu terminal Tasi-Tolu,” dehan Afonso
Iha parte seluk agora dadaun husi parte Bombeiros mós apoiu ona bero ida tan hodi tula ajuda komunidade sira ne’ebé moras no inan isin rua husi área Masin-Lidun nian hodi mai asesu saúde iha sidade laran
Entertantu, Dalan husi área Masin-Lidun, no dalan husi área Lagoa-1 to’o Lagoa 3 oras ne’e rai monu taka estrada metin no bee kontinua nalihun to’o kanotak, no komunidade balun obrigatoriu la’o sa’e ba leten foho depois tun husi parte João Paulo II nian hodi asesu merkadu Tasi-Tolu no merkadu mak sosa sasan ne’ebé sira presiza, inkluí mós komuidade balun husi Comoro mós aluga bero hodi tula hahan ba sira nia uma iha Lagoa 1-3 iha Tasi-Tolu nian.
Jornalista : Acacio Pinto
Asisten : Egidio Nono
