Lafaek News–Ministra Saude, Odete Maria Freitas Belo, afirma populasaun munisipiu Kovalima la hakat ba ospital halo tratamentu tanba tauk swab.
“Ita hare’e antes ne’e, kada loron sira fó partus ba inan isin rua liu nain 4 ou 5, maibé ohin ita bele hare’e loron 1 ema 1 mak mai partu iha hospital, ho razaun ema sira ne’e la mai halo tratamentu iha hospital ne’e, tanba sira tauk, kuandu tama iha hospital tenki halo swab, ita lalika tauk, hau rasik mós swab, tanba ne’e kuandu moras ne’e mai hospital, kuandu moras todan tiha iha uma mak ita ba foti ne’e dala ruma ita bele salva ou labele salva,” esplika Ministra Saúde Odete Maria Freitas Belo, ba jornalista sira iha Hospital Referal Kovalima, Kuarta (21/07/2021)
Ministra Saúde Odete Maria Freitas Belo informa, Pesoal Saúde sira iha Hospital Referal Kovalima preokupa tamba komunidade sira la ba halo tratamentu iha hospital, hanesan inan isin rua sira la ba, dala ruma loron 1 sira fó partus ba inan nain 1 deit, no iha sala adultu mós mamuk.
Ministra Saúde ne’e mós enkoraja komunidade sira atu ba halo tratamentu iha hospital, liu-liu bainan isin rua sira, tanba sira partus deit iha uma ne’e mak sei aumenta taxa mortalidade ba inan ho oan sai aas.
Nune’e, iha vizita ne’e, atu hare mós ba iha farmasia no oinsa kondisaun ai moruk nian ba pasiente sira ne’ebé mak halo tratamentu iha hospital Covalima.
Iha fatin hanesan Diretór Hospital Referal Covalima, José Moniz Fereirra, informa, hospital referal ne’e nafatin nakloke ba ema hotu, liu-liu ba inan isin rua sira, maibé ho situasaun Covid ne’e mak kada loron inan isin rua sira ba halo tratamentu ne’e menus.
“Ho situasaun Covid ne’e, loron ida ami fó partu ba ema nain 1 deit ou bele mós la iha liu, no ita hotu hare’e iha sala baisa ne’e kama barak mak mamuk, tanba ema la mai halo tratamentu iha ne’e, ho razaun katak sira tauk atu swab,” esplika Diretór ne’e
Jornalista : Sandi Belo
Editór : Agapito de Deus
