Lafaek News-(Lautem)–Uma kain atus rua lima nulu (250) husi suku mahina II postu administrativu Lautem, Munisipiu Lautem too agora seidauk asesu eletrisidade hanesan ho komunidade sira seluk.
“Ami aldeia Lereado ho Lereira uma kain hamutuk atu rua lima nulu too agora seidauk asesu ba eletrisidade dezde husi ukun aan too agora komunidade vizinu sira seluk komesa asesu ona maibe ami nafatin seidauk sente ita nia ukun aan,”dehan Inasio Branco ba Lafaek News, iha Lereado (20/07/2021)
Nia dehan, iha tempu kalan moris nakukun impaktu tebes ba labarik estudante sira atu halo sira nia estudu iha oras kalan, sente diskriminasaun boot tanba komunidade balun asesu eletrisidade maibe balun kontinua moris iha nakukun iha tempu kalan.
“Ida ne’e tanba kalan-kalan ami sempre moris iha nakukun laran, komunidade seluk asesu ona estrada ne’ebe kaber no ahi lakan iha tempu kalan kuitadu ami mak vitima hela de’it no la sente ukun aan ida ne’e,” komunidade ne’e lamenta.
Entretantu autoridade lokal xefe Aldeia Lereado, Abilio Marques akresenta, kompania balun hahu tula ona besi-rin eletrisidade tau iha aldeia refere, maibe tinan rua ona atu ba tolu besi-rin ne’e latan de’it iha rai too sai furuzen ona,
“Ami ne’e vitima iha funu laran no ukun aan tiha ona mos ami nafatin vitima tamba suku vizinho sira ahi komesa lakan maibe ami nia aldeia too agora ami moris iha nakukun laran kompanha lori ai rin ne’e mai enfeita deit ami nia aldeia maibe ahi la lakan too agora labarik sira estuda mos ladiak tamba ami uja kamí hodi sunu hodi halo naroman uma laran” tenik sefi aldeia ho oin triste.
Jornalista : Anselmo Monteiro
Editor : Agapito de Deus
