Kovalima (Lafaek News)—Populasaun aldeia Baer suku Beiseuk, postu administrativu Tiliomar, munisípiu Kovalima tempu udan konsumu de’it merak hodi responde nesesidade lor-loron.
Jornalista Lafaek News entrevista ho Xefe Aldeia Baer Florindo da Silva iha nia rezidénsia Segunda (11-01-21) katak populasaun 275 kuru de’it bee mota hodi sustenta sira nia nesesidade hanesan tein, haris no fase hena no bainhira tempo udan sira utiliza de’it udan ben hodi tein no haris.
imajen ne’e labarik ida kaer hela kaneka iha liman atu tisi bee mota enxe iha masa litru-5 hodi lori ba uma. foto LN Chamot RCCT.
“Ami ba kuru bee iha mota ho distansia mais ou menus metro atus lima (stegah kilo), maibe kalo tempo udan mak mota tun ami uza de’it udan ben hodi tein no fase bikan, ami haris de’it bee merak, iha tempo bailoro ami uza bee mos ka mon tanba ami suma ka ke bee iha mota laran, maibe udan hanesan ne’e ami susar tebes atu hetan bee mos” Dehan Xefe Aldeia Baer Florindo da Silva.
Autoridade local ne’e haktuir, uluk sira dada bee husi aldeia Tula-Iduk Suku Lalawa mai iha aldeia Baer, maibé la to’o tempo naruk bee matan maran tanba bailoron naruk, tan ne’e laiha dalan seluk tenke konsumu bee mota ne’ebé kór merak.
“Uluk ami dada be husi be matan iha Aldeia Tula Iduk neba, maibe lakleur de’it be matan ne’e maran tia ntaun ami labele ona uza be ne’e, no ami kontinua fali kuru be iha mota baer ne’e” tenik Xefe Aldeia Baer ne’e.
Nia deham, atu solusiona problema bee moos ne’e iha aldeia refere, komunidade sira akumula hanoin hamutuk atu kanaliza bee husi foho leten mai aldeia refere, maibé kbiit seidauk no presiza tulun mós husi governu mak bele realiza sira nia planu ne’e.
“Ami iha ona Planu atu dade bee husi be matan ida iha foho nebe, be matan ne’e naran wee Kolokehik, maibe ami persiza ajuda husi governu tanba ami nia kbiit la to’o atu dada bee lori tuun mai to’o ami nia Aldeia” katak Florindo ba Lafaek News.
Iha sorin seluk abitante Aldeia Baer Zacarias Inácio, husu ba Governu liu-liu ministériu Kompetente atu bele ba matan ba sira nia moris, tanba sira mos hola parte hanesan Povu iha nasaun RDTL ne’e.
“Ami iha Aldeia Baer ne’e, hahu kedas husi Primeiro Governu to’a Agora ami kuru de’it be iha mota hodi mai tein, fase bikan no mos haris, maibe kuandu iha tempo udan ami labele kuru bee iha mota tanba mota tun no be sai merak” dehan Zacarias Inacio.
Jornalista : Chamot Nahac
Editora : Nelya Barros
