Lafaek News–Tersa (02/11/2021) tuku 05 loro kraik Grupu deskonhesidu asalta malu iha Rate-laran postu Zumalai, PNTL eskuadra Zumalai husu ajuda ba komunidade apoiu kareta privadu hodi ba halo intervensaun ba joven sira ne’ebe asalta malu.
Komandante Eskuadra Zumalai, Inspetor Polisia Antonio Soares informa, selebra loron finadu situasaun iha postu adminitrativu ne’e kontroladu, maibe iha parte lorokraik grupu deskonesidu asalta malu iha rate Santa Kruz Maliseran Zumalai.
Iha informasaun, grupu rua asalta malu maibé Ami seidauk hatene grupu ne’ebé mak asalta malu tan ohin ami husu ona ajuda ba komunidade balu atu apoiu kareta mai ami hodi ba iha fatin akontesimentu núnee bele hakalma situasaun no hatene grupu se-se mak asalta malu,” dehan Komandante Antonio ba Lafaek News iha nia kna’ar fatin Zumalai Kovalima, tersa 02/11/2021.
Komandate Eskuadra Zumalai Antonio deklara, dadaun ne’e transporte iha eskuadra PNTL Zumalai la funsiona atu fasilita membru PNTL sira halo patrolla iha Postu Zumalai nia laran hodi garante situasaun.
Iha ne’e ami garante seguransa maibé transporte laiha entaun susar tebes atu ami halo patrolla hodi akompanha situasaun iha postu Zumalai, foin lalais ami tenta ona komandante munisipiu no husi munisipiu hato’o ona ba Komandu Jeral maibé ate agora seidauk iha resposta ba ami nia transporte,” Nia deklara.
Nia esplika, Durante ne’e sira sempre akompanha komunidade sira liu liu ba motorista sira ne’ebe la uza kapasente sira prende motor atu motorista selu multa ba ninia aktu, maibe sira la halo patrolla tan kareta eskuadra nia foin lalais baku fila ate agora seidauk hadia ka seidauk hetan kareta foun husi Komandu Jeral no komandu munisipiu.
Ha’u orinta ba membru sira katak, ita laiha transporte maibé ita iha ne’e monitoriza situasaun karik posivel ita bele ba, maibe mak la posivel entaun ita labele ba, tanba atu atua masa ne’e tenke tun ekipa la’os nain ida rua mak ba ne’e la bele,” nia fundamenta.
Antonio afirma, problema ne’e mosu kuaze besik oras ida, maibé polisia seidauk to’o iha fatin akontesimentu, tanba depende komunidade sira nia kareta hodi fo apoiu PNTL tula polisia sira lori ba fatin akontesimentu hodi hala’o atuasaun.
Jornalista : Orlando Magno
Editor : Agapito de Deus
