Lafaek News–Primeiru Ministru Taur Matan Ruak ohin sesta, (19/11) fó pose ba prezidente komisaun rai no propriedade komisáriu nain 11 hodi rezolve problema disputa rai iha Timor-Leste.
Primeiru Ministru Taur Matan Ruak hateten, rai mak bein ida ne’ebé importante tebes ba populasaun rurál sira, atu uza hodi tulun sira atu hatutan sira nia moris no sai fatór ida ba poténsialidade konflitu, piór liu kuandu iha dezenvolvimentu tempu ukun an nia folin ne’e makaas.
Uluk iha Metinaru kuandu hau sei jenerál, sosa metru kudradu $3 dolar, ohin $3 dolar mós la hetan, foin dadauk atu haree rai ida iha Komoro fatin temporáriu ba ita nia maluk vitima dezastre nian kada metru kuadradu $150 dolar, entaun envolve valór boot, signifika kadavez nia valór ne’e boot mais provabilidade ba disputa ne’e boot, pior liu tan balun uluk faan tiha foti fila fali deit,” dehan Primeiru Ministru liu husi nia diskursu iha Salaun PKM Palasio Governu Dili, sesta (19/11/21).
Nune’e estadu Timor-oan buka ona dalan atu kria rejime jurídiku ida ne’ebé bele regula propriedade privada no estabelesimentu ba rejime ne’e sai hanesan dezafiu polítiku no tékniku ne’ebé bo’ot, tanba sirkunstánsia istóriku sira ne’ebé nasaun joven ne’e enfrenta ona, halo kna’ar sai todan liu tan.
Iha fatin hanesan, Ministru Justisa (MJ), Manuel Carceres hateten, komisaun terras no propriedade nia knaar atu buka no rona hodi halo dijsernimentu ho imparsialidade no neutralidade tuir mekanizmu konsiliasaun ninian atu rezolve disputa rai iha nasaun laran.
Ohin ita boot sira hato’o komprimisu de onra ba sua exelénsia Primeiru Ministru ho distintus konvidadus sira nia oin katak ita boot sira sei servisu ho imparsialidade, neutralidade la tau interese pesoál ka interese grupu iha ita boot sira nia oin bainhira hala’o knaar ida ne’e,” informa MJ Manuel Cárceres.
Enkuantu tuir dadus rejistu iha diresaun terras no propriedades Timor-Leste atualmente iha mais de 55 mill kazus disputa kona-ba rai, 13 mill rejista iha servisu rutinas diresaun jerál terras no propriedades sira nian, 42 mill liu rejistu servisu nasionál kadastrus ne’ebé intrega ona ba Ministériu Justisa.
Entretantu lista ba komisaun terras propriedades ne’ebé simu posse hamutuk sanuluresin ida (11) kompostu husi, Prezidente Komisaun Terras Pascoal da Costa Soares, membru hamutuk walu (8) no suplente nain rua (2).
Jornalista : Juvita dos Santos
Editór : Agapito de Deus
