Lafaek News—Komisaria Komisaun Nasional Direitu Labarik (KNDL) Dinora Granadeiro, iha ambitu komemorasaun mundial direitu labarik ba dala XIII, husu entidades hotu-hotu atu serbisu makas hodi tau matan no asegura labarik sira nia direitu iha Timor Leste.
Komisaria KNDL esplika, governo reatifika ona konvensaun direito ba labarik iha tinan hirak liu ba depois Timor Leste ukun rasik a’an maibé ate agora seidauk asegura ho didi’ak labarik sira nia direito, tan ne’e nafatin hato’o ba sosiedade sivil no membru governu no inan-aman hotu atu matan ba labarik nia diretu demokrasia.
“Agora ita seidauk asegura didiak labarik nia direito tanba ne’e husu ba entidades hotu atu ita bele tau matan ba sira nia direito de demokrasia,” dehan komisaria Direito Labarik, Dinora Granadeiro, liu husi nia diskursu iha salaun sentru formasaun Tibar Likisa, Sesta (19/11/2021).
Nia fundamenta, komisaun mós konsidera katak ohin loron laiha lei legislasaun ba protesaun direito labarik no governu Timor Leste, tanba ne’e nia parte husu komisaun F parlamento nasional hare’e hodi halo protesaun ba labarik sira.
“Lei ne’e sei sai hanesan matadalan no baze legal ida ba servisu instituisaun sira hotu hodi halo protesaun ba direito labarik iha nasaun ida ne’e,” dehan nia.
Jornalista : Manuel Andrade
Asisten Editór : Pedro de Ameida
