Lafe News–Organizasaun Noun-Governamental (ONG), PERMATIL hatudu rezultadu di’ak liu husi kee debu iha laletek foho Leolbatan, aldeia Lakofoan suku Costa sub-Rejiaun Pante Makasar, Rejiaun Administrativa Espesial Oe-kusse Ambenu (RAEOA), komunidade sira la halerik ona bee mos iha tempu bailoron naruk.
Koordenador Permatil Oe-kusse, Arnold Suni Informa, iha tinan 2022 ho inisiativa indentifika debu antigu iha laletek foho Leolbatan, mobiliza komunidade servisu voluntáriu kee hodi kuda udan been, komunidade iha Aldeia Lakofoan tinan barak mak uza udan been ba nesesidade moris.
“Fo-foun ami tama iha aldeia Lakofoan kee debu ne’e komúnidade hotu la fiar, maibé ami enkoraza no esplika ba komunidade kona-ba prosesu ida ikus mai bee matan antigu sira moris fali ohin loron ita haree susesu di’ak tebes bee matan antigu sira maran moris fali ita nia Komunidade uza to’o agora bee la maran ona,” Dehan nia ba jornalista Iha Laletek Foho Leolbatan Aldeia Lakonfoan (23/01).
Iha tinan 2022, Permatil tama iha aldeia Lakofoan dahuluk identifika bee matan antigu sira iha foho hun ne’e sukat nia volume ne’e kiik, depois kordena ho Autoridade Komunitariu ho Komunidade no lia nain sira aseita ona mak halo tuir lisan oho manu mean husu Natureza nia aseitasaun mak foin kee debu.
“Iha prosesu kordenasaun halo tuir kultura lisan aldeia Lakofoan ita husu lisensa ba natureza oho manu mean hatudu sinal di’ak, hafoin ami organiza malu kee debu ne’e rezultadu hatudu bee matan antigu sira iha foho hun, tempu bailoron naruk matan bee moris fali no ida ne’ebé bee menus aumenta to’o agora komunidade uza nafatin,” informa nia.
Nia informa, bee matan antigu iha tempu bailoron maran no menus ne’e, kauza husi hahalok ema nian la respeita natureza halo to’os kada tinan muda ba mai estraga hotu ai no sunu rai to’o molik ikus mai rezulta bee matan sira ne’e maran no menus.
“Hahalok komunidade sira halo to’os muda fatin ba mai, tanba rai ne’e eransa sira nian, entaun halo tuir sira nia hakarak ikus mai bee matan antigu sira maran no menus,”
Nia dehan, prátika komunidade halo to’os la permanente iha fatin kada tinan muda ba mai ne’e, tanba karakter uza demokrásia ne’e tama liu kedas ba liberdade ne’e, menus fiar ba kultura no lisan
Entretantu tuir dadus estatistika sensu uma nain Timor-Leste tinan 2022, komunidade uma nain 182 aldeia Lakofoan asesu ona bee matan ne’ebé Permatil kuda iha laletek foho Leolbatan.
Jornalista : Felix Fernandes
Editor : Agapito de Deus
