Lautém-(Lafaek News)—Abitante na’in rua (maun alin) ne’ebé viajen husi Dili ba Lautém detetadu pozitivu Covid-19, hafoin teste swab no da-daun transferénsia ona tamas ala izolamentu hodi simu tratamentu saúde.
Diretór Servisu Saúde Munisípiu Lautém, Bernardo Amaral Lopes, sábadu (10/04) ba jornalista katak pasiente nain rua foti sai ona husi fatin kuarentena lori ba sala izolamentu AVR Lospalos, tanba rezultadu teste iha kinta feira semana kotuk iha Baukau hatudu nain rua mak pozitivu.
“Amostra sira ne’e ita lori iha kinta,ohin dadersan sira fo rejultadu katak husi sentru ital amostra ne’ebé mak ita lori ba sira nain rua ne’ebé mak tama iha kuarentena nain rua mak pozitivu, tan ne’e ami hamutuk oinsá atu bele jere sira ne’ebé pozitivu tau ketak no sira ne’ebé kuarentena nafatin iha kuarentena, haree ba pasiente rua nia kondisaun sira nain rua pozitivu ho asintomatiku, katak laiha sintomas ruma, maibé tanba pozitivu ita tau ketak atu halo observasaun frekuente hodi haree tok sira nia mudansa kada loron nian,” katak Bernardo Amaral Lopes.
Entretantu, ekipa saúde hamutuk ho autoridade munisípiu Lautém tun direta hodi halo trasferensia pasiente covid-19 nain rua husi fatin kuarentena polu UNTL naturál Lospalos mai iha sala izolamentu AVR Lospalos, totál abitante ne’ebé tama mai iha munisípiu Lautém hahú husi loron 4 mai to agora hamutuk 94, nain rua pozitivu Covid-19.
Jornalista : CE.Lautém
Editora : Agapito de Deus
