Lafaek News—Fraternidade umana nu’udar kna’ar Igreja nian atu lori ema hotu-hotu moris hanesan maun alin tanba mesak maromak nia oan no hadomi Maromak no hadomi ema seluk.
Asuntu ne’e hato’o husi Diretór Programa Edukasaun no Sidadania JPIC, Pe. Domingos Soares “Maubere” hafoin ho ekipa hasoru malu ho Prezidente Repúblika José Ramos-Horta hodi komvida xefe Estadu atu partisipa iha komemorasaun fraternidade umana ne’ebé sei monu iha loron 4 fulan Fevereiru tinan 2023.
“Ko’alia kona-ba fraternidade umana ne’e nu’udar kna’ar Igreja nian atu hala’o, fraternidade umana katak hotu-hotu moris hanesan maun alin tanba hotu-hotu mesak Maromak nia oan no hadomi Maromak no hadomi ema seluk”, hateten Diretór Programa Edukasaun no Sidadania JPIC, Pe.Domingos Soares “Maubere”, iha Palasiu Prezidensiál Bairu pite tersa, (31/01/2023).
Tuir Pe. Maubere Importante atu hotu-hotu hanoin no refleta hikas sentidu loloos husi fraternidade umana, tanba konflitu barak demais ne’ebé ema maun alin de’it mak halo at ba malu, estraga malu entaun oinsá mak hala’o hodi fila fali ba ida idak nia abut sira, ba ida idak nia kultura hodi hanoin mesak Timoroan, mesak sarani no iha Igreja mak uma lisan boot hotu-hotu tenke hakbesik iha ne’eba no husi ne’e mak tama ba iha sosiadade hanesan masin no naroman.
“Fraternidade umana no moris hakmatek buat importante mak justisa, ema dala barak la komprende malu, la rona malu tanba justisa ne’e laiha no dala ruma ema nia moris la fó importánsia ba valor sira ne’ebé fó influénsia direita ba ema nia moris ne’e rasik”.
Iha okaziaun ne’e xefe Estadu mós fó sujestaun ba parte Igreja ne’e atu oinsá mak Igreja fó resposta uitoan ba arte marsiais, ba joven sira no okupa joven sira atu oinsá Igreja mós bele iha Peace Corp ne’ebé bele bá hela iha populasaun nia leet hodi aprende no tulun sosiadade ida ne’e.
“Fraternidade Umana ne’e doutrina Igreja ninian tanba ne’e hotu-hotu tenke haree malu hanesan maun alin no hotu-hotu Maromak nia oan liu husi fiar ne’ebé iha”, esplika Pe. Domingos Soares.
Jornalista : Rita Moniz
Editór : Agapito de Deus
