Lafaek News—Diretor Eskola bázika Sentrál Lospalos, Ernesto dos Santos, husu Ministériu Edukasaun Juventude no Desportu (MEJD) atu aselera prosesu uniforme estudantes hodi hatais ba eskola.
“Ami rekoilla ona osan kada estudante $ 40 ba farda pár rua, maibé ami hetan fali despaisu husi Ministériu edukasaun atu halo farda uniforme ba eskola sira da-daun ne’e ami sei rai hela osan iha ne’e hodi hein,” katak Diretor EBS Lospalos ne’e ba lafaek news foin lalais.
Nia argumenta, osan ne’ebé rekoilla husi inan-aman sira too agora sei rai hela iha eskola, tanba bazeia ba despaisu MEJD nian atu halo produsaun ba uniforme foun, maibé too agora seidauk iha rezultadu pozitivu, maske mandate governu hela de’it rohan ona.
“Ami sei rai hela osan iha ne’e kuandu ministériu halo farda uniforme ona ami sei entrega fali osan ne’e direta ba inan-aman sira, maibé ami husu mós Ministeriu aselera prosesu nune’e estudantr sira bele hatais uniforme nafatin, ami hein de’it tanba agora estudante setomo anu sira la uja ona farda uniforme ne’ebé mak eskola halo no hein hela Ministeriu Edukasaun nian,” nia fundamenta.
Hatan ba ezijénsia ne’e, Diretór Edukasaun Munisípiu Lautém, Rui Manuel Miranda da Costa Branco, katak farda jestaun Timor tomak nian no entrega fila ba kompetensia Ministeriu Edukasaun no too agora seidauk iha despaisu legal ruma hosi parte kompetente.
“Ami hanesan implementador rona no halo saida mak Ministeriu hatun mai ami, sirkular iha ona ona hodi hapara eskola sira produs farda ba estudante sira maibé parte Ministeriu sedauk iha nia kontinuasaun hodi fo orientasaun ba ami halo serbisu no ami hein de’it kundu iha orientasaun ami halo iha Munisípiu,” katak diretór edukasaun municipal Lautém ne’e.
Diretur munisipal edukasaun munisípiu Lautém ne’e sublina, farda nia modelu deskute hotu ona tuir sirkular ne’ebé hasai ona husi minsitériu edukasaun, maibé nia kontinuasaun seidauk.
“Ha’u hein de’it kuandu iha orientasaun ha’u sei halo serbisu no ha’u sei la ko’alia polítika, tanba ha’u ezekutador iha ona dezeñu ba farda sira no ita hein de’it,” katak Rui.
Jornalista : CE. Lautém
Editor : Agapito de Deus
