Lafaek News–Ligadu ho pandemia Covid-19, bankada opozisaun husu atu kontrola no taka area Fronteira sira la’os hapara atividade transporte marítima husi Dili ba Oe-cusse, tanba povu presija nesesidade loro-loron.
Deputada, partidu Congressu Nasionál Rekonstrusaun Timor (CNRT), Lúcia Taeki hato’o deklarasaun ne’e iha Parlamentu Nasionál katak kazu Covid-19 nain tolu iha RAEOA importadu, nune’e nia parte husu kontrola máximu iha Fronteira, la’os atu taka transporte marítima hodi hapara nesesidade povu nian.
“Ha’u nia preokupasaun maka kazu covid-19 ita hetan husi ema nia nasaun, nusa lakontrola makas iha jalan tikus atu labele lori moras ne’e mai, ita hapara fali ró,” deklarasaun ne’e hato’o husi deputada opozisaun CNRT, Lucia Taek, iha PN, tersa, 12/01.
Nia hatutan, kazu Covid-19 importadu, la’os akontese husi Dili ba Oe-kusse, tanba ne’e la presiza taka movimentu ró, tanba povu Oe-cusse presiza nesesidade.
“Ita taka movimentu ró oinsa ho preokupasaun povu iha Oe-cusse, atu atende sira nia nesesidade loron-loron, liga mós programa sesta bazikas ne’ebé atu ajuda povu, se ita taka tan ró ne’e ita atu hanoin saida ba povu Oe-cusses nia nesesidade,” tenik nia.
Hatan ba preokupasaun ne’e, Ministru Transporte Telekomunikasaun (MTK), José Agustinho da Silva, hatete konektividade ró-hai Dili ba Oe-kusse atu transporta de’it nesesidade bazikas no kombustivel iha situasaun estadu emerjénsia ne’e.
“Movimentu transporte martima ba Oe-cusse ita asegura nafatin, so transporta de’it nessesidade bazikas iha Oe-cusse no mós asegura nafatin ita nia kobustiveis ka mina ba ita nia populasaun sira iha rai enclave Oe-cusse,” hatete Ministru.
Jornalista : Pedro de Almeida
Editora : Nelya Barros
