Lafaek News–Funsionáriu Públiku (FP) ida hetan stroke hafoin simu vasina astrazeneca dose daruak iha sentru Bairu Farmoza Dili.
Vitima ne’e ho naran Joanico Correia da Silva, mai husi munisipiu Baukau, postu administrativu Vemasse, da-daun ne’e hela iha Tasi-tolu BTN3 aldeia Terra-santa, suku Madohi, munisipiu Dili no hala’o nia knaar núdar funsionáriu públiku iha Gabinete Primeiru Ministru.
Vitima Joanico Correia da Silva konta kronolojia katak nia tenke simu vasina tanba bazeia ba despaxu husi governu katak, núdar funsionáriu estadu tenke simu vasina mak foin tama servisu, maine simu tiha vasina akontese fali moras seluk ne’ebe la funsiona kedan isin lolon ne’ebe servisu buka osan hodi sustenta oan sira nia eskola inklui nesesidade uma laran.
“Vasina primeiru iha dia 18 laos hau mesak mak vasina maibé ho kolega funsionáriu sira hotu inklui hau nia xefe deparmentu sira hotu,” katak vitima Joanico ba Jornalista iha nia rezidénsia Tasi-tolu BTN3 Dili, sesta (20/08/21).
Vitima Joanico Correia da Silva hateten, nia simu vasina dose dahuluk nia sente kolen la oituan de’it, maibé iha dose daruak tanba ema barak entaun la konsege koko tensaun vasina de’it, ne’e nia mak kalan ne’e akontese kedas ain liman kolen até nia sofre moras struck.
“Iha vasina pertama ha’u sente duni maibé ladun, iha fali vasina kedua dia 23 juñu ne’e komu ema barak entaun la koko tensaun ida, ami ba langsun vasina de’it no iha kalan ne’e akontese kedas liman ain kolen, oin nakukun no akontese duni struck,” informa vitima Joanico.
Iha fatin hanesan, vitima nia kaben Natalia Gonzaga akresnta, iha loron 24 fulan juñu familia sira tula kedas vitima ne’e ba sentru komoro, depois haruka liu ba Ospitál Nasionál Guidu Valadares (HNGV) no médiku sira detekta katak pasiente ne’e pozitivu covid-19, entaun kontinua lori mai Vera Kruz durante loron lima, no iha loron 7 fulan jullu alta fila mai uma até agora kondisaun struck nafatin.
“Médiku sira dehan hau tenke lori nia ba terapi loro-loron, ne’ebé desde alta ne’e hau ba terapi semana rua nia ne’e lao hela de’it,” dehan Natalia Gonzaga.
Entretantu familia husi vitima ne’e husu ba governu atu fó apoiu finaseiru ruma ba sira atu nune’e bele ajuda hola materiál sira ne’ebé vitima presiza ba nia saúde. Tanba despaxu husi Governu katak ema ne’ebé vasina hetan struck governu sei fó subsidiu maibé durante fulan rua ona vitima Joanico seidauk hetan ajuda ruma husi parte relevante.
Jornalista : Juvita dos Santos
Editor : Agapito de Deus
