Lafaek News-(Ainaru)-Sekretariu Estadu Asuntu Veteranus Kombatentes Libertasaun Nasional (SEAKLN), Gil Oan Soru, afirma nia prontu sai husi governasaun lieradu Taur Matan Ruak, sai tanba moe governu dada de’it fiu rohan ida mós labele.
Oan Soru hatoo asuntu ne’e liu husi intervensaun polítika kampañia dahitu iha munisípiu Ainaru (09/03/2020), hateten husu deskulpa ba inan-aman sira, tanba nu’udar membru governu viabilizador lideradu Taur Matan Ruak, maibé mandatu governu ida ne’e atu remata ona fiu rohan ida nunka dada ba povu nia uma.
Husu deskulpa ba inan-aman sira, hau membru ida husi governu ne’e, ha’u prontu sai aban, tanba saidaa nein fiu metru ida ami la dada ba imi-nia uma, tanba ne’e hanesan imi nia oan sente moe,’’ afirma Gil Oan Soru.
Oan Soru dehan tan, oitavu governu ne’ebé husi partidu FRETILIN sobu sistema barak iha governu viabilizadu husi FRETILIN ne’e, la’o hakat liu regras konstituisaun konsikuénsia ba povu kiik, dezenvolvimentu la la’o, roda ekonomia paradu, hamoe estadu Timor ba iha komunidade internasional nia matan.
Tanba ne’e, povu tomak iha Timor liu-liu inan-aman sira kuidadu didi’ak atu labele monu ba manipulador sira liman, sira fo osan simu, maibé labele fo votus ba ema ne’ebé laiha kapasidade atu ukun rai ne’e, nasaun ne’e presiza ema matenek hanesan José Ramos Horta ho Xanana mak bele hadia rai ho povu ne’e sai nabilan.
Imi nia votus ne’e determina futuru nasaun, vota minutu ida sofrementu tinan lima, tanba ne’e kuidadu didi’ak imi votus, maibé rai Timor ne’e lulik no mate sira klamar moris, tan ne’e mak ita ukun an, más agora ita haluha tiha, labele lori osan sosa votus, maibé hau fiar Ainaru tenke manan ho númeru 14,’ Oan Soru hakotu.
Jornalista : Abekha Raihusar
Editor : Agapito de Deus
