Lafaek News—Relasiona ho presu fos ne’ebe da-daun folin sa’e iha merkadu nasional, parte governu liu husi Ministériu Komérsiu no Indústria sei normáliza fos nia folin iha supermerkadu hotu iha territóriu nasional.
Asuntu ne’e hato’o husi Ministru Komérsiu no Indústria (MCI), Nino Pereira iha sorumutu nakloke ho funsionáriu públiku hamutuk nain 201 iha Salaun Sentru Konvensaun Dili (CCD-sigla portuges) kinta (31/08/2023) governo sei halo enkontru ida ho empreza importador sira hodi nune’e bele normáliza hikas presu fos iha merkadu sira.
“Ita sei halo diskusaun tanba aban ita sei halo enkontru ho empreza importador sira ba fos nian ne’e diskute oinsá mak iha tempu badak ida ne’e normáliza fila fali presu Fos nian ne’e,” Nino Pereira sublina.
Governante ne’e mós reafirma iha tempu badak mós sei halo enkontru ida ho Ministériu Agrikultura hodi Hare liuliu kona-ba presu básiku kona-ba Hare (fos-lokál) da-daun iha rai laran.
“Ami mós sei halo diskusaun ho Ministériu Agrikultura atu deside presu Báziku ba Hare husi presu Báziku, ba Hare ne’e mak ita foin deside presu ba iha fos kada kilograma,” nia akresenta.
Entretantu Iha sorumutu alargada ne’e halo diskusaun kona-ba funsionáriu públiku sira hodi haree kona-ba servisu sira ne’ebé da-daun ne’e la’o ona no mós servisu sira ne’ebé sei planeia hela ba loron 120 nian, tanba ne’e presiza konsolida ba iha ministériu nian kona-ba oportunidade ne’ebé ministériu iha hodi nune’e bele alkansa programa no atividade da-daun planeia ona.
Iha enkontru ida ne’e ita ko’alia kona-ba polítika lX governu nian kona-ba mós planu edukasaun, tanba ita ko’alia beibeik ona katak ita la’ós duni de’it mak kuantidade husi ezekusaun ne’e rasik, maibé ita mós presiza haree kualidade husi Ezekusaun ita prezisa orienta ba ita nia funsionáriu sira atu bele apár ho situasaun ida ne’e,” Nino hateten.
Nia salienta tan katak ba kargu xefia sira nafatin fo konfiansa ba sira (funsionáriu) hodi nune’e sira bele asegura interese ba ministériu nian oinsá bele servisu ho ekipa, laiha super hero maibé iha de’it mak super tim ne’ebé bele asegura polítika ministériu nian.
Entretantu Funsionário permanente ne’ebé da-daun ne’e hala’o servisu iha Ministériu Komérsiu no Indústria Hamutuk ema nain 201.
Jornalista : Felix Fernandes
Editor : Agapito de deus
