Lautem-(Lafaek News)—Portavos ekipa taskforce Munisípiu Lautém kombate covid-19 iha Lautém, Jacinto da Costa lee sai regulamentu foun hamutuk hitu hodi regula ema ne’ebé husi Dili tenke hatudu rezultadu swab negativu hafoin bele tama Lautém hodi evita transmisaun lokal.
Regras hitu ne’e mak hanesan tuir mai, primeiru sidadaun sira husu Munisípiu afetadu atu tama mai iha area juridika Munisípiu Lautém, tenke hatudu rejultadu teste swab negativu, ho prazu labele liu loron 3 sura husi tempu foti teste nian.
segundu, ema ne’ebé hatudu rezultadu swab negativu la’o hamutuk (sa’e kareta ho motor hamutuk) ho ema ne’ebé laiha rezultadu swab, tama iha area jurídika munisípiu Lautém tenke tama iha kuarentena.
Terseiru, ema ne’ebé tama iha area jurídika munisípiu Lautém, bainhira la hatudu rezultadu swab negativu, tenke tama kuarentena bainhira rezeita, sei haruka fila-fali ba fatin husi ne’ebé nia mai.
kuarta, labele hakat liu area fronteira jurídika munisípiu Lautém, iha tempu kalan tenke iha tempu rai sei loron, entre tuku 7 dader too tuku 6 loraik.
Kintu, vendedores ne’ebé mai husi munisípiu seluk, sei transfere de’it sasán iha fronteira no la tama direita mai iha area jurídika munisipiu Lautém.
Seisto, laiha autorizasaun ka bandu transporte públiku sira, atu desloke sai husi area jurídika munisipiu Lautém, ezempluu ba ida ne’ebé ho razaun urjente tula hahán nesesidade bázika ka material konstrusaun.
Setimu, transporte ne’ebé atu tula hahán ka nesesidade bázika tenke ba tula de’it iha Metinaru kuandu tama ba Dili fila-fali mai tenke hatudu rezultadu swab negative.
Regulamentu ne’e asina direta husi administradór Munisípiu Lautém, Domingos Savio, no regras ne’e foun hitu ne’e estabelese iha loron 25 Abril 2021, vigoradu no implementa hela iha Munisípiu Lautém too ohin loron.
Jornalista : CE.Lautem
Editór : Agapito de Deus
