Lafaek News—Autoridade Munisípiu Lautem servisu hamutuk ho ekipa taskforce deside reativa eskola, inklui missa no atividade sira seluk la’o normál, tanba hare’e ba surtu Covid-19 iha Lautém ladun iha risku ona.
Administradór Munisípiu Lautém, Domingos Savio, esplika, desizaun ne’ebé entes ne’e deside hodi taka eskola públika no privadu inklui atividade seluk tanba meus ida atu halo prevensaun ba surtu Covid-19, maibé risku iha Lautém ladun ona tanba ne’e koordena ho ekipa taskforce reativa hikas atividade hotu, maibé kontinua obedese ba regras MS no OMS.
“Ita loke fali eskola públika no privadu sira, atividade jogu tradisionál, missa, merkadu no atividades sira seluk ba komunidade sira iha Munisípiu Lautém, maibé ita tenke kontrolu makas atu nune’e sidadaun sira kumpri nafatin ba regras Oragnizasaun Saúde Mundial (OMS) no Ministériu Saúde (MS) nian,” dehan Administradór Munisípiu Lautém, Domingos Savio, ba lafaeknews iha salaun Administrasaun, segunda, (31/05/2021).
Administadór mós orienta ona ekipa taskforce atu rezolve pagamentu ba kompañia sira ne’ebé fornese hahan ba kuarentena no izolementu sira.
“Husu ba ekipa atu aselera lalais pagamentu ba Kompañia sira atu nune’e sira servisu nafatin ba abitante sira ne’ebé kontinua tama mai iha Lautém, tanba abitante sira nia karta mate persija kuarentena, nune’e kontinua fornese hahan ba sira,” rekomenda Domingos Savio.
Nune’e mós administrator informa, ba abitante Lautém oan iha Dili ne’ebé tuir ona teste swab atu mai nia horik fatin validu ba loron tolu de’it, se liu loron tolu máka sei fila ba Dili ou kumpri kuarentena loron 14 iha Lautém.
“Ekipa kria regras ne’e tanba iha faktus balun hatudu katak teste swab kleur liu máka abitante sira mai bele trasmmite mós Covid-19 mai iha munisípiu Lautém,” Nia hokotu.
Jornalista : CE Lautém.
Asisten Editór : Pedro de Almeida
