Lafaek News—Ministru Turizmu Komérsiu no Indústria (MTKI), José Lucas do Carmo, husu populasaun suku Nunu-Mogue postu administrativu Hatu-Builiku, munisípiu Ainaru atu proteze no sai na’in ba dezenvolvimentu turizmu.
Governante ne’e hatoo asuntu ne’e iha ámbitu serimónia fo posse ba membru konsellu konsultivu na’in-6, inklui grupu AST Rabeka nu’udar grupu traballu turizmu komunitáriu iha suku Nunu-Mogue.
“Objetivu husi vizita Suku Nunu-Mogue ne’e, hodi fo tomada de posse ba Prezidente ho membru Konsellu Konsultivu, no estabelese grupu traballu turizmu komunitáriu, tanba turizmu komunitáriu nia konseitu ne’e rasik maka oinsá komunidade maka tenke sai nain ba dezenvolvimentu turizmu ne’e,” afirma MTKI José Lucas do Carmo iha suku Nunu-Mogue segunda semana ne’e.
Ministru ne’e subliña, grupu rua ne’ebé simu ona posse, nia papél importante tebes, simu responsabilidade katak sira sei hamosu ideia atividade konseitu orijen turizmu Nunu-Mogue nian.
Iha serimónia ne’e, xefe suku Nunu-Mogue, Hilario da Costa, haktuir nu’udar autoriedade lokál sente kontente no agradese ba vizita Ministru Turizmu Komérsiu no Indústria, ho vise Ministra hodi implementa projetu komunitáriu iha suku refere.
Mídia MTCI : Koka Araújo
Editór : Agapito de Deus
