Lafaek News- Ministru Turizmu Komérsiu no Indústria (MTKI), José Lucas do Carmo da Silva, afirma programa Cesta Bázika governu hanesan implementadór, la signifika governu mesak mak iha direitu tau matan, maibé entidade hotu iha direitu no dever atu halo kontrolu ba programa refere.
“Imi jornalista mós tuir. Ita hala’o iha Metinaru, Hera no Suai. Atu dehan de’it katak, ita hotu-hotu iha responsabilidade atu hare no tau matan ba programa sesta bázika,” MTKI José ba jornalista sira iha resintu CCD-Dili, hafoin partisipa semináriu nasionál ne’ebé hala’o hosi Inspesaun Jerál Jogu (IGJ) kona-ba anti branquementu kapitaís liuhosi atividade jogu sosiais rekreativu diversaun no tradisionál, kinta (10/12).
Hatutan nia, governu nafatin koopera ho komisaun anti korrupsaun (CAC) hodi halo kontrolu ba distribuisaun sasán, karik mosu problema ruma KAK bele toma ninia papél hodi halo investigasaun.
Tanba ne’e, KAK nafatin hamutuk ho governu la’o hodi halo kontrolu ba atividade ne’ebé daudaun ne’e governu implementa, atraves hosi kompañia sira fahe ba komunidade sira.
Alende ne’e nia mós informa, programa sesta bázika ne’ebé daudaun ne’e la’o iha kapitál nasaun, governu kontrata kompañia lubuk hodi implementa programa refere.
“Iha Dili laran loza 12, ita servisu ho sira, maibé ne’e la’o faziadamente. Tanba ne’e iha loza 3-4 la’o daudaun ona, ne’ebé ha’u la temi ida-ida iha ne’e, maibé ita bo’ot sira hare ezemplu iha Dili Mart no Lider (komesa distribui ona sesta bázika),” tenik nia
Jornalista : Zeferino Barreto Gomes
Editór : Ezequias Tomás
