Lafaek News–Espoza Prezidente Repúblika, Cidália Lopes Nobre Mouzinho Guterres, Sesta (11/12/2020), lansa dahuluk Torneiu Basketbol Feminina ho naran Tasa Rotativa Primeira Dama 2020.
Diskursu Espoza Prezidente Repúblika iha primiru abertura ba eventu importante ne’e, hateten nia parte fó nia apoiu tomak ba inisiativa ne’e, tanba nu’udar dalan alternativa ida atu promove talentu feto iha área desportu basketbol, empodera feto atu moris saudavel ne’ebé sei fó impaktu ba fíziku no espíritu esportivu no hapara violénsia hasoru feto no labarik.
Tasa Rotativa Primeira Dama 2020 ne’e hala’o iha ámbitu komemorasaun Loron Nasionál ba Feto ne’ebé monu iha 3 novembru, Loron Konvensaun Direitu Labarik, 20 novembru no kampaña ativismu loron 16 hapara violénsia hasoru feto no labarik.
Tasa Rotativa Primeira Dama 2020 nu’udar kompetisaun desportiva dahuluk ne’ebé organiza husi Gabinete Apoiu Atividade Konjuge Prezidente Repúblika hodi fó biban ba feto sira ne’ebé iha poténsia iha área basketbol atu dezenvolve-an fizikamente ho psikolojikamente.
“Nu’udar inan no feto, há’u apela nafatin no bebeik, ba sosiedade tomak, mai ita hamutuk fó liman ba malu hodi hatoo ba mane maluk sira, atu respeita ita-nia feto no labarik sira iha uma ka fatin públiku,” Cidália Guterres hateten.
Númeru violénsia hasoru feto no labarik sei kontinua aas. Tanba ne’e, espoza Prezidente Repúblika husu ba Estadu fó atensaun boot liután ba protesaun no formasaun igualdade jéneru, especialmente hakbiit feto no labarik. Espoza Prezidente Repúblika kontinua enkoraja ba vítima violénsia sira atu labele tauk hodi buka justisa no husu apoiu ba entidade relevante sira atu hamutuk kontra atitude violentu hasoru feto no labarik.
Maibé, feto no labarik barak mak ohinloron seidauk iha koñesimentu kuandu sai vítima husi violénsia. Barak mak sei hili nonok de’it no hetan violénsia oioin no balun hili hakotu sira-nia vida tanba la hetan apoiu atu sai husi problema sira ne’ebé hasoru.
Torneiu ne’ebé partisipa iha ekipa basketbol feminina hamutuk na’in-12 sei remata durante semana rua nia laran. Tasa Rotativa Primeira Dama 2020 bele hala’o tanba hetan mós apoiu husi Federasaun Nasional Basketbol Timor-Leste no Rayates.
MÍDIA GAAC.