Lafaek News—Ministru Transporte Komunikasaun (MTC (siglá Portuges), José Agustinho da Silva,rekoñese movimentu transporte públiku iha sidade Dili la organizadu tanba la iha regra rigorozu hodi kontrola.
José Agustinho da Silva esklarese, sirkulasaun transporte públiku ne’ebé movimentu iha Kapitál Dili, dezorganizadu tanba husi ema individu ka sidadaun sira ne’ebé maka iha ekonomikamente iha kapasidade finanseira sira sosa kareta hanesan mikrolete, taxi, no Bis, maibé agora problema mak oinsá laiha kontrolu.
“Sirkulasaun transporte públiku ne’ebé movimentu iha Kapitál Dili, dezorganizadu tanba husi ema individu nian, tanba tanba transporte ne’e ema individu ninian ka sidadaun sira ne’ebé maka iha ekonomikamente iha kapasidade finanseira sira hola kareta, mikrolet, balun taxi, no BUS, mas agora problema mak oinsá mak ita organiza sira tanba ne’e mak ha’u dehan dezorganizadu,”dehan MTK, José Agustinho da Silva, iha resintu PN, (11/11/2020).
Nia afirma, MTK fó ona orientasaun ba tékniku sira iha husi ministériu ne’e nian liu husi diretór jerál too nasionál transporter terrestres no asesores sira oinsá bele jere transporte públiku hirak ne’e.
“Sei kria regulamentu para oinsá regulariza transporte sira ne’ebé liu prazu ona nia tinan produsaun movimentu sai suar tanba ne’e sei afeta ba envariomentu la seguru, ita haree mikrolet sira agora dadauk ne’e la priense ona kriteria ita bele dehan sira laiha ona kondisaun atu asegura pasajeiru sira nia vida tanba ita haree husi liur ne’e mesin foun maibé nmia mesin ne’e produsaun antigun ona,” José dehan.
Enkuantu MTK ne’e reforsa, ba futuru sei reforsa liu iha inspesaun ne’ebé rigorozu hodi kontrola másimu karreta liu-liu transporte públiku sira hanesan mikrolete ho taxi inklui kontentór.
Jornalista : Pedro de Almeida
Editora : Nelya Barros
