Lafaek News—Ministra Saúde (MS) Odete Maria Freitas Belo, hala’o vizita ba Óspital referal Covalima hodi hare’e prosesu konstrusaun ba fatin ICU, izolamentu no laboratorium ne’ebé to’o agora sedauk finaliza tan ne’e husu kompañia atu aselera.
“Projetu ne’ebé mak halo hela iha Kovalima ne’e, ami iha fatin ICU 1, fatin izolamentu ba kazu pozitivu Covid-19 grave nian 1, no Laboratorium 1, ami husu kompañia atu bele aselera ninia prosesu konstrusaun,” hateten Ministra Saúde Odete Maria Freitas Belo ba jornalista sira iha Covalima, Kuarta (21/07/2021).
Odete hatutan, projeitu konstrusaun ne’ebe halo iha Covalima, ICU maka prontu ona, maibé fatin iozolamentu no laboratorium sedauk, nune’e ita husu nain ba kompañia sira atu bele finaliza lalais konstrusaun ne’e.
Entretantu kompañia ne’ebé kaer projeitu konstusaun máka, ba fatin ICU responsavel husi emprezariu Giovanio Unipesoal Lda ho orsamentu $189,959,69 ne’e remata ona iha dia 30/11/2020, responsavel ba fatin izolamentu mak Roman Junior Unipesoal Lda ho orsamentu $ 262,452.00, nia data remata 23 Dezembro 2020, nune’e mós responsavel ba konstrusaun Laboratorium mak Manu-Bey Unipesoal Lda ho montante orsamentu $70,747.68, no remata iha 11 Marsu 2021.
Jornalista : Sandi Belo
Asisten Editór : Pedro de Almeida
