Lafaek News–Ministériu Publiku (MP) rejista dadus akuzasaun no husu julgamentu iha prosesu komum ho intervensaun tribunal koletivu tuir artigu 236 no 14 Kodigu Prosesu Penal (KPP) hasoru arguidu nain tolu ho inisial EDJ, CAX ho ÁEA ne’ebé deskonfia halakon osan partidu Frente Mudanca valor total USD $ 52,600.00.
Tuir karta akuazasaun ne’ebé hatun husi ministériu publiku hasoru ema nain tolu ne’e tanba iha insidious sufisiente katak iha loron 23 fulan Dezembru 2020, liu husi pedidu responsavel finansa partidu Frente-Mudanca nian, Maria Belina Fernandes, prosede cheque (chek) ho númeru 00488457 ANZ, montante USD $.6,600.00, ho objetivu atu finansia atividade nian.
Cheque ne’e responsavel finansa entrega ba sekretariu jeral partidu Frente-Mudanca, Ricardo Cardoso Nheu ho EDJ nu’udar prezidente interinu partidu Frente-Mudanca hodi asina molok ba halo levantamentu osan referidu iha banku ANZ.
Hafoin SekJen P-FM, Ricardo Cardoso Nheu asina tiha cheque ne’e, responsavel finansa lori ba entrega ba prezidente interinu partidu FM asina, maibé la asina ho razaun prezidente interinu ne’e sei konfirma ho sekretariu jerál partidu Frente-Mudanca Ricardo Nheu molok nia tau asinatura iha cheque refere.
Mezmu nune’e, EDJ la konfirma kestaun cheque nian ho Ricardo no bainhira parte finansa nian ba husu ba EDJ, dehan cheque ne’e nia les tiha ona, haree katak kleur demais ona no laiha rezultadu husi cheque ne’e, nune’e sekretariu jeral Frente Mudanca, Ricardo Cardoso Nheu ba buka kedan prezidente interinu FM hodi konfirma, maibé resposta husi EDJ katak cheque ne’e lakon tiha ona.
Tuir Sekretariu jeral partidu Frente Mudanca iha entrevista hateten, kazu ne’e nia rasik ho estrutura partidu mak ba hatoo iha ministériu públiku tanba osan partidu nian labele utiliza arbiru sein rekonesimentu husi estruturu partidu Frente Mudanca.
Ricardo hateten nia rasik dúvida ho resposta prezidente interinu FM nian nune’e nia (Ricardo) haruka parte finansa partidu nian ba konfirma iha banku ANZ, maibé husi parte ANZ resposta katak finansas partidu nian labele asesu ba konta bankaria refere, tanba EDJ blokeia tiha ona.
Ha’u buka konfirma kedan ho banku ANZ, tanba ha’u mak nuudar sekretariu jeral no tuir estatutu partidu nian ha’u iha direitu hodi asesu ba konta bankaria partidu FM nian, bainhira ha’u konfirma tiha ona banku ANZ, deteta iha loron 29 Dezembru 2020, EDJ ba halo tiha levantamentu ba osan ho kuantia USD $.6,600.00 no montante ne’e koresponde ho montante iha cheque númeru 00488457 ANZ ne’e,’’ Ricardo Cardoso Nheu afirma.
Ricardo sente lamentavel ho lala’ok EDJ nian ne’ebé halo levantamentu ba osan ho kuantia refere sein konesimentu husi estrutura partidu nian, liu-liu sekretariu jeral Frente Mudanca, tanba tuir rejimentu estatutu partidu hafoin cheque ne’e hetan asinatura hodi sekretariu jeral ho arguido EDJ responsavel finansas mak iha direitu halo levantamentu ba osan partidu nian iha banku ANZ, maibé seidauk akontese EDJ ignora tiha ida ne’e hodi ba direta iha banku ANZ halo levantamentu ba osan hirak ne’e la tuir regras partidu nian.
Iha loron 17 fulan Marsu hau rasik hetan notifikasaun ida husi banku ANZ fo hatene hau katak nu’udar sekretariu jeral no nudar mos ema ida ne’ebé uluk partidu deside fo konfiansa hodi loke konta bankari partidu Frente mudanca nian iha ANZ hodi taka tiha konta partiu nian iha banku refere, tanba ANZ rasik atende de’it konta negosiu nian, atu hatan ba pedidu ne’e hau reprezenta partidu hodi halo pedidu ida ba ANZ no husu ba banku ANZ taka tiha konta bankaria nian iha ANZ no muda fali ba BNCTL, transferénsia osan partidu nian husi banku ANZ ba banku BNCTL saldu ikus ho montante USD $71,202.87,’’katak Ricardo.
Ricardo dehan, Iha loron 24, fulan Maiu 2021, EDJ simu cheque ida hodi ho númeru 0132049, husi koligasaun Frente Dezenvolvimentu Demokrátiku (FDD), ho montante USD 23,000.00, no osan montante ne’e tuir regras partidu FM nian tenke hatama ba konta partidu nian, maibé la halo ida ne’e no osan montante referidu mos la fo hatene ba estrutura partidu nian no uza osan ne’e sein justifikasaun ruma ba estrutura partidu.
Iha loron 5 fulan Junu 2021, sekretariu jeral Ricardo Cardoso Nheu simu karta ida hosi tezoreira partidu FM, ne’ebé dehan katak osan hirak temi iha akuzasaun númeru 14 ho 15, EDJ, CAX ho ÁEA nian ne’e rezulta Partidu Frente-Mudanca sofre ka hetan prejuizu ho valor total USD $ 52,600.00.
Sira hatene katak osan ho montante hirak ne’e osan partidu nian no sira la devia uza osan sira ne’e ba sira nia privadu rasik, entaun prejudika arividade partidu Frente-Mudanca nian liu-liu atividade sira liga ho konsolidasaun partidu nian iha baze,’’ Ricardo akresenta.
Hatan ba asuntu ne’e, Prezidente Interinu Partidu Frente Mudanca, ho inisial EDJ, rezeita total akuzasaun hirak ne’e konsideradu falsu no ilegal, husi duun matak hirak ne’e faktus publika ona iha jornal repúblika.
Ne’ebé enkuantu sira bosok, lalehan ho rai no publiku mak sei hatene, lia loos ha’u nian mak publika ona jornal repúblika iha loron 5 Abril 2022 ne’e, katak osan sira duun matak ne’e laiha iregulaidade no laiha apsoens lei, orsamentu partidu nian fo ba povu mak nikmati, osan hirak gasta harii tanke bee mos ba povu iha Haupu, Letefoho munispiu Ermera, distribui ba fahi ba grupu kooperativa sira, inklui halo manu-luhan ho fahi luhan, iha Fatuahi nomos iha Baukau, dokumentus hotu iha, notas hotu iha, tanba osan partidu nian tenke lori ba povu mak nikmati,’’katak prezidente interinu partidu Frente Mudanca ne’e.
EDJ afirma nia parte sei la hakfodak simu akuzasaun husi Ministériu Publiku ka husi ne’ebé de’it, kazu ne’e tama ona iha tribunal nune’e tribunal mak sei deside loos ho sala.
Ha’u la hakfodak akuzasaun husi Ministériu Publiku ka husi see de’it, kazu ne’e iha tiha ona tribunal, ita hein tribunal mak sei deside lia loos ho lia falsu,’’ EDJ hakotu.
Jornalista : Agapito de Deus
Editor : Floriano Soares
