Lafaek News–Movimentu Feto Progressivu husu ba Centru Comunidade Covalima Fasilita Formasaun Lideransa no publik speaking ba Feto suku Matai.
Koordenadora Movimentu Feto Progressivu, Remigia Caldas Lopes de Carvalho hateten, Formasaun lideransa no publik speaking importante tebes ba feto sira, atu oinsá feto sira bele iha mentalidade ko’alia iha oin.
Tanba tuir Remigia nia observasaun, Feto sira iha suku Matai barak maka berani, iha hanoin diak, maibe se’i tauk no la fiar Aan, tanba sei menus kunesementu.
“Formasaun ba feto sira, oinsa maka atu fiar Aan kolia no hetan oportunidade Iha familia no sosiadade,” Nia hateten, Iha Matai, Kinta (18/06).
Nia fiar katak, bainhira feto suku Matai barak mak hetan ona Formasaun no kunesementu, konserteza feto sira sei kontribui no halo mudansa di’ak ida iha familia no iha suku laran.
Hatan ba kestaun nee, Program Manager Centru Comunidade covalima, Bernardino de Jesus, konkorda katak, kapasitasaun lideransa importante tebes ba Feto sira, tanba nee CCC iha ona planu atu halo.
“Sira nia hanoin ne diak, Sira hakarak atu centru Fasilita sira ho kapasitasaun, Centru Comunidade Covalima Iha ona planu Konaba treinamentu lideransa no komputador ba Feto potensial sira iha covalima tarjeitu ba Ema atus ida, ita hakarak promove liu Sira Nia kapasidade, hasae Sira Nia kunesimentu,” nia hateten.
Kona-ba movimentu feto progresivu hakarak atu CCC Fasilita Formasaun ba feto suku Matai, Bernardo hateten, sei koordena no Informa ba diretora CCC oinsa mak bele realiza atividade ne.
“Ha’u sei Informa ba diretor centru kona-ba asuntu ne oinsá mak ita bele haree ida ne,” Nia hakotu.
Jornalista : Venidora Oliveira
