Lafaek Nws—Cash Manager Fundasaun Fórum Komunikasaun Joventude (FFKJ) Dom Bosco Balide, Domingas Pereira konsidera, Labarik sira iha aldeia Fatumean, suku Tibar postu-administrativu Bazartete munisípiu Likisa, iha ne’ebé loron-loron halo atividade hili lixu sustenta ba nesesidade uma laran maibé iha futuru sei fó impaktu negtaivu ba sira nia saúde.
“Agora ne’e ita bele dehan katak ne’e di’ak maibé iha futuru fó impaktu boot ba sira nia saúde tanba moras sei mai iha loron ida, tanba sira loron iha lixu hodi buka sasan ne’ebé máka prazu liu no kalen at sira ba tetu hodi bele sosa fali hahan ba sira, maibé iha lixu ne’eba,” dehan Cash Manager F-Fcj Dom Bosco Balide Domingas Pereira ba jornalista sira iha ambitu komemorasaun loron mundial direito labarik iha Sentro formasaun Tibar Likisa, Sesta (19/11/2021).
Nia dehan, durante ne’e Cash Manager Fundasaun Fórum Komunikasaun Joventude (FFKJ) Dom Bosco Balide máka halibur labarik sira no inan aman sira hotu ne’ebé máka hala’o sira nia serbisu iha lixu Tibar inklui mós ho labarik estudante balun hotu.
“Sira iha lixu fatin ne’e kuaze labarik hamutuk 50 máka iha ne’eba no agora menus uitoan tanba ita hatama ona balun ba eskola, husi F-FCJ máka selu sira nia eskola tanba menus ekonomia no problema uma laran,” hatutan nia.
Tuir nia, labarik ne’ebé máka hala’o serbisu iha lixu Tibar sira moris ho kondisaun familia ne’ebé mak ladi’ak no balun fali hodi lixu nia resultado bele muda familia nia moris hetan di’ak.
“Sira ba hili lata sira ba tetu bele ajuda sira hodi sosa lalais foos lata ida hodi han no iha balun fali ita konsidra katak lori lixu sira nia familia moris hetan di’ak hanesan bele hadia uma no sosa tan buat seluk,”nia salienta.
Nia relata desafius ne’ebé máka iha tinan 2019 FFCJ hasoru hanesan menus transporte hodi transporta labarik ne’ebé máka sira atu lori ba hatama iha eskola, maibé ida ne’e la hamate sira nia espiritu servisu sosiál ba maluk ne’ebé máka presiza sira nia tulun.
Enkuantu iha fatin hanesan Inan faluk Rogaia Martins agradese tebe-tebes ba apoiu servisu sosiál husi Sentru Miguel Magone balide FFCJ ne’ebé máka ajuda ona sira nia oan balun ba eskola maske labarik sira la kontinua too remata tanba menus ekonomia atu selu too universidade.
“Ha’u hanesan familia kliente ida nebe máka uluk serbisu iha lixu fatin maibé nia (Domingasa Pereira) ajuda ami no lori ami ba uma Mahon Miguel Magone Ou FFCJ ne’ebé máka ajuda ona ha’u hanesan hatama ona ha’u nia oan nain tolu kompostu husi feto rua mane ida, sira eskola too remata,”nia hatutan.
Ikus nia rekomenda ba FFCJ atu kontinua nafatin serbisu sosiál tanba iha familia ne’ebé máka moris ho kondisaun menus ekonomia tanba familia barak máka sei enfrenta problema.
Jornalista : Manuel Andrade
Asisten Editór : Pedro de Almeida
