Lafaek News—Komunidade Suku Maskariñas postu administrativu Vera-Kruz munisipiu Dili, Natercia Tilman, afirma relasiona ho desizaun governu deside izola munisípiu Dili husi munisípiu sira seluk, presiza garante nesesidade moris lor-loron ba povu kiik.
“Ita tenke la’o tuir governu nia desizaun maibé ami nia preokupasaun kona-ba aihan ne’ebé ita presiza konsumu loro-loron hanesan foos, tanba ami nia atividade ne’ebé iha labele halo ona entaun ami atu hetan osan husi ne’ebé,” dehan Natercia ba lafaek News iha nia rezidénsia suku Maskariñas, foin lalais ne’e.
Pandemia COVID-19, hanesan moras ne’ebé labele haree, tanba ne’e ema ida-idak tenke tau iha nia konsiénsia didi’ak oinsá prevene aan husi moras aat ne’e.
“Ha’u nia hanoin regulamentu ne’ebé estadu fo sai ona ita komunidade tenke halo tuir tanba ida ne’e di’ak ba ita hotu nia saúde no ita nia vida núne’e bele prevene moras no evita COVID-19 sirkula iha ita nia rai doben ida ne’e, maibé governu tenke garante aihan ba ami povu kiik sira,” Natersia Esplika.
Iha sorin seluk, estudante UNTL, Agustino dos Santos, sente preokupa tebes tanba da-daun ne’e osan laiha atu selu ba kos nain.
“Pesoal ha’u sente triste tebes tanba loron mos too ona atu selu kos, maibé osan laiha atu selu tanba pai ho mãe sira mos atu haruka osan mai la di’ak, maibé la buat ida ita nafatin halo tuir regulamentu ne’ebé estadu fo sai ona,” Agustino subliña.
Estudante ne’e mós preukupa katak, da-daun aihan iha uma laran hanesn foos atu hotu ona no osan mos laiha ona atu sosa inan-aman iha foho labele haruka osan mai Dili tanba lockdown.
“Ami prontu halo tuir saida mak estadu fo sai ona maibé oinsa ho ami nia nesesidade loro-loron nia tanba ami nia fos mos atu hotu ona se fo ne’e hotu ami uza saida mak atu sosa serake ami nia hela fatin mos sedauk selu,” estudante UNTL ne’e preukupa.
Jornalista : Orlando Magno
Editora : Nelya Barros
