Lafaek News—Diretór Asossiasaun HAK, Sisto dos Santos, afirma presiza involve lider komunitáriu sira atu servisu hamutuk ho polisia iha ámbitu covid-19 atu bele evita atetude oknum polísia ne’ebe aplika violénsia fíziku hasoru povu kiik sira periodu estadu emerjénsia.
“Tanba ne’e dezde fulan tolu kotuk liu ba HAK insiste estadu iha ámbitu Estadu Emerjensia ka konfinamentu obrigatóriu liu-liu iha Dili laran, presiza involve lider komunitariu sira,” dehan Diretór Asossiasaun HAK Sisto dos Santos, ba lafaek news via whatsapp, sesta (12/03/2021).
Hodi dehan, bainhira estadu kontinua ignora lider komunitáriu sira nia papél iha ámbitu konfinamentu obrigatoriu ida ne’e iha poténsia bo’ot kazu oknum polísia aplika violénsia fíziku hasoru sidadaun sei kontinua akontese.
“Governu presija harii Posku popular ida instala ba iha bairo no suku hodi nune’e posku ne’e bele atende nesesidade báziku sidadaun nian no atu lidera posku ida ne’e mak estrutura lider komunitariu sira,” Sisto sujere.
Tuir nia katak, durante ne’e parte Asossiasaun HAK nota katak, akontesimentu sira ne’e mosu tanba koordenasaun entre liña ministerial sira la’o atrazadu, iha akontesimentu iha loron 8 fulan Marsu, oknum polísia baku traballadór rekolla foer ne’e hatudu mo-mos katak desizaun konsellu ministru tun ona maibé atraza tebes komunika ba liña ministeriail sira.
“Liu-liu papél funsionamentu husi sentru integradu jestaun krize nian la rapidamente komunika ba nia membru sira iha terenu tanba ne’e membru sira dezorientadu no ida ne’e frakueza bo’ot nivel altu nian,” esplika nia
Sisto aseita iha ámbitu konfinametu ne’e nesesáriu, maibé karik nesesidade uma laran obriga komunidade sira laiha sira tenke sai hodi buka nesesidade hanesan foos sosa hodi haan iha periodu estadu emerjénsia ne’e, polísia sira mós hala’o nia kna’ar, maibé aplika fali violénsia, ida ne’e mak la di’ak no tenke muda.
Tanba, polísia nu’udar ajente protetór ba populasaun nia direitus umanus, maibé agora iha públiku nia matan sai fali ameasa ba sidadaun sira, asosiasaun HAK nia hanoin katak ba Parlamentu Nasionál liu-liu komisaun A no komandu jerál liu husi sentru integradu jestaun krize atu haree situsaun ne’e sai asuntu prinsipál hodi prioritiza.
“PDHJ nu’udar instituisaun direitus umanus tuir lolos sira halo ona asaun imediata tanba aktu violensia oknum polísia loron ba loron aumenta,” hakotu nia.
Jornalista : Felisberto da Costa Fernandes
Editora : Nelya Barros
