Lafaek News—Prezidente Repúblika, José Ramos-Horta ho delegasaun to’o iha Aeroportu Internasionál Changi Singapura ho aviaun Singapore Airlines no simu diretamente husi Adjuntu Ministru Negósiu Estranjeiru Singapura, Mohd Osman no Embaixadora Timor-Leste iha Singapura, Maria Viegas Carrascalão.
“Prezidente Repúblika, José Ramos-Horta ho delegasaun to’o iha Aeroportu Internasionál Changi Singapura ho aviaun Singapore Airlines no simu diretamente husi Adjuntu Ministru Negósiu Estranjeiru Singapura, Mohd Osman no Embaixadora Timor-Leste iha Singapura, Maria Viegas Carrascalão,” sita husi komunikadu imprensa ne’ebé lafaek news asesu liu husi média Palasíu Presidensiál Kuarta (07/12/2022).
Entretantu Delegasaun Xefe Estadu kompostu husi membru parlamentu na’in lima no Ministru Koordenadór Assuntu Ekonómiku, Joaquim Amarál.
Xefe Estadu hahu viajen iha loron 6 fulan Dezembru ho aviaun komersiál Air Asia no tranzita Bali (Indonézia), hafoin kontinua viajen no to’o iha Singapura iha tuku 22:00 (Oras Singapura) no kontinua ba otél ne’ebé prepara ona.
Ajenda vizita Prezidente Repúblika hahú ho vizita bá Embaixada Timor-Leste iha Singapura. Programa ofisiál Estadu nian markadu iha loron 8 fulan Dezembru ho enkontru entre Prezidente Repúblika José Ramos-Horta ho nia homólogu husi Singapura Halimh Yacob no Primeiru Ministru, Lee Hsein Loong.
Xefe Estadu mós sei partisipa iha forum emprezariál ne’ebé organiza husi Governu Timor-Leste ho apoiu husi setór Privadu rai rua, halo mos palestra iha institutu Yusof Ishak no sei partisipa mós iha entrevista ho media balun.
Enkuatu sita iha komunikadu ne’e katak, Timor Leste no Singapura estabele relasaun diplomátiku hahú kedas iha Maiu tinan 2002, hafoin Timor-Leste restaura nia independénsia.
Prezidente Repúblika ho delegasaun sei to’o hikas iha Timor-Leste iha loron 11 Dezembru 2022 ho voo diretu husi Singapura mai Timor-Leste.
Jornalista : Rita Moniz
Editór : Agapito de Deus
