Lafaek News–Ministériu Komérsiu no Indústria realiza atividade retiru hodi formula vizaun, planu no asaun ministériu nian ba dezenvolvimentu seitor komérsiu no indústria iha mandatu IX Governu Konstitusionál, hala’o iha Sentru Konvensaun Dili, durante loron rua (Kinta14 – Sesta 15 Setembru 2023).
Ministru Komérsiu no Indústria Nino Pereira, iha diskursu abertura, realsa importánsia husi retiru institusionál ne’e, no aborda polítika IX Governu Konstitusionál ne’ebé atribui ba Ministériu Komérsiu no Indústria.
“Ita-nia retiru ida-ne’e, dalan atu promove no dezenvolve sentimentu hanesan, hola-parte iha ekipa serbisu ne’ebé fahe vizaun ida, planu ida no asaun ida ba dezenvolvimentu seitor komérsiu no indústria iha Timor-Leste. No hatene loloos objetivu estratéjiku, no programa sira ne’ebé hakarak alkansa iha IX Governu Konstitusionál.” Ministru afirma.
Liutan ministru akresenta, retiru nu’udar espasu ba diskusaun hodi define prioridade sira ne’ebé Ministériu Komérsiu no Indústria bele ezekuta iha periodu ikus tinan 2023, no definisaun prioridade ba tinan 2024.
“Ita hatene katak retiru ida-ne’e hola-parte iha hanoin ba objeisaun no disponibilizasaun ba rekursu umanu ne’ebé presiza ba ministériu nia serbisu, ho dever atu uza reskursu finanseiru no materiál sira ho rigor, reforsa medida sira no foka liu ba rezultadu ne’ebé Ita hakarak loloos iha kuadru atruibusaun Ministériu nian.” Kontinua Ministru.
Ba ida-ne’e, Ministru Komérsiu no Indústria apela ba dirijente sira no kolaboradór sira iha Ministériu Komérsiu no Indústria atu partisipa ativu iha diskusaun, hodi fó hanoin krítiku, lojíku no sai solusaun ba problema sira, nune’e bele garantia moris di’ak ba povu Timor-Leste.
“konvida Ita hotu ne’ebé marka prezensa iha ne’e, atu partisipa ho hahalok ne’ebé hatudu interese no vontade, ho hanoin katak, Ministériu nia kontribuisaun no obrigasaun institusionál fó garantia moris di’ak no dignidade sidadaun tomak.’’ Ministru apela.
Iha sorin seluk, Vise Primeiru-Ministru, Ministru Koordenadór Asuntu Ekonómiku, no Ministru Turizmu no Ambiente Francisco Kalbuady Lay, iha abertura, apresia inisiativa kuadru sira Ministériu Komérsiu no Indústria nian, ne’ebé ba dahaluk iha IX Governu Konstitusionál, organiza retiru hodi define vizaun, planu no asaun estratéjika hodi dezenvolve seitor komérsiu no indústria.
“Ida-ne’e retiru primeiru ne’ebé mak hahu ona, husi membru governu no ministériu hot-hotu, iha mandatu IX Governu Konstitusionál. Parabéns ba Ita boot sira. Husu Ita Boot sira tenke hamutuk ho Ministru no Vise-Ministru atu serví ho fuan ba povu no rai ida-ne’e.’’ Dehan Vise PM.
Vise Primeiru-Ministru mós esklarese prioridade sira IX Governu Konstitusionál ne’ebé sei ezekuta iha periodu hirak tuir mai, no liu-liu esforsu sira ne’ebé Governu hala’o hodi prepara Timor-Leste nia adezaun ba ASEAN.
“Governu iha prioridade ba kresimentu ekonómiku, desentralizasaun, hadiak institusaun sira hotu (liu-liiu sistema finanseira), no husu Maromak tulun, ho kapasidade Primeiru-Ministru, Ita dada kadoras greater sunrise mai Timor-Leste, no ikus liu, esforsu ba adezaun ASEAN.” Dehan Vise Primeiru-Ministru.
Nu’udar adisaun, polítika IX Governu Konstitusionál konsentra ba reafirmasaun Estadu direitu demokrátiku, dezenvolvimentu kapitál sosiál, dezenvolvimentu infraestrutura, dezenvolvimentu ekonomia, konsolidasaun governativa no kombate korrupsaun.
Retiru ne’e partisipa husi parseiru dezenvolvimentu sira, dirijente no funsionáriu sira iha Ministériu Komérsiu no Indústria nian. Atividade ne’e sei konklui ho definisaun prioridade sira ba Ministériu Komérsiu no Indústria nian, ne’ebé termina iha loron aban, Sesta, 15 Setembru 2023.
Media MCI.
