Lafaek News— Movimentu Juventude Millennial (MJM), sabadu ne’e (21/08/2021) lansa konferensia Imprensa hodi husu eis Primeira Dama, Isabel Ferreira atu kandidata-an hodi kompete iha festa demokrasia eleisaun presidensial 2022.
“Relasiona ho festa demokrasia ne’ebé ita sei realiza iha tinan 2022, ba prezidente repúblika períudu tinan 2022-2027, maka ami MJM hakarak husu Dra. Isabel da Costa Ferreira atu kandidata independente ba prezidente repúblika,” dehan, porta –vóz MJM, Aniceto Alberto Carlos, Benfika, sabadu, (21/08/2021).
Portavóz afirma, MJM ho prontidaun hodi manifesta sira nia apoi inkondisionalmente ba kandidatura Isabel Ferreira iha eleisaun PR periodu 2022-2027 ho razaun fundamental sanulu (10) ne’ebé MJM konsideradu atu suporta Isabel Ferreira;
Ema ne’ebé tenke sai prezidente republika, tenke mai hosi kandidatura independente no tenke feto. Isabel Ferreira hanesan líder joven ida no bele hahú atu loke odamatan ba juventude sira hodi luta ba mudansa no hanesan ema atevista ida ne’ebé sempre luta ba direitus human iha TL.
Eis Primeira Dama Isabel Fereira iha kapasidade plena atu ezerse funsaun nudar PR, no ema ne’ebé nakonu ho personalidade no karakter; karidade, solidaridade, onestidade, tolerante no amante ba paz.
Portavoz MJM afirma iha istoria Timor Leste, liuliu iha iha momentu krusial hanesan da-duan ne’e, prezidente repúblika tenke ho jeneru feto, presiza prezidente ida iha sentimentu hanesan inan.
Tan ne’e, tempu ona atu eleje feto ba PR, ida ne’e dalan ida atu promove igualidade generu iha TL no Isabel Ferreira mak MJM propoin atu kompete no kompleta ba kandidatura PR, tanba Prezidente Repúblika feto de’it maka bele sai mediadora di’ak hodi solusiona problema hotu-hotu hodi lori ikas esperansa ba Timor oan tomak.
“Maluk Juventude sira, tempu ona atu ita sai protogonizta ba mudansa ne’ebé ita hotu hakarak no mehi. Labele tuur hodi sai de’it hanesan mera observadór! É preciso a coragem para pensar diferente e lutar por diferenças. Avante!,” porta-vóz, hakotu.
MJM halo ona prosesu aproximasaun ho kandidatura ne’e no iha ona 99,9%, kandidatura ne’e hakarak atu kandidata-an ba Prezidente Repúblika ba periodu 2022-2027.
“Ami iha ona prosese de aproximasaun no iha ona 99,9% maka nia hakarak atu kandidata-an ba Prezidente repúblika, nia daudaun ne’e sei iha Portugal, fila mai nia sei konfirma sim ou nao ba iha ninia kandidatura,” dehan, Prezidente MJM, Juvênvio Amaral.
Prezidente MJM afirma, konferensia imprensa ida ne’e hanesan fase primeiru ne’ebé MJM halo atu husu no manifesta sira nia apoiu ba kandidatura Isabel ba Prezidente Republika iha periodu 2022-2027.
Estajiadu : Simão João Mira Fraga
Editor : Agapito de Deus
