Lafaek News—Relasiona ho desizaun governu suspende ensinu aprendisajen prejensiál ba ensinu baziku to’o ensinu sekundaria iha Dili hahú husi loron 17 to’o 31 Agostu 2021, estudante barak lakon nia materia no la asesu eskola online ho di’ak.
Tuir estudante Sergio Vieira de Melo Bekora, Anapaula Rodrigues Vieira hatete, durante governu implementa estadu emerjensia no serka sanitária hodi bandu eskola hotu paradu, hahú husi ne’eba to’o agora la partisipa masimu iha aula no eskola online mós la asesu.
“Ha’u senti tristi bainhira eskola suspende hela de’it, halo ha’u lakon ha’u nia materia, atu estuda husi online mós telefone laiha,” hatete estudante Anapaula Rodrigues ba jornalista lafaek news iha nia rezidensia metin foin lalais ne’e.
Anapaula iha maun alin hamutuk na’in hitu, nia mak nu’udar oan ikun husi Alberto Soares dos Santos (matebian) ho Izabel Soares Vieira 59, moris hanesan oan ki’ak defisil tebes atu hetan osan hodi sustenta estudu ne’e ho di’ak.
“Osan la iha atu hola telfone, osan atu kopia de’it materia mós laiha husu mae mós osan laiha pai mós mate atu husu los ba se, ha’u tur iha uma hanoin barak ema sira asesu estuda online nee’ sira sei hetan susesu, maibé susar mai ha’u atu hetan susesu,” dehan Anapaula.
Iha fatin hanesan inan husi Anapaula, Izabel Soares Vieira 59, haktuir, durante nia laen kaben husik nia iha tinan 2019 sente lakon buat hotu no laiha kbi’it atu fasilita oan sira hala’o estudu, sorti di’ak haki’ak netik animal hanesan manu timor, bibi no fa’an ai-sunu, maibé ne’e la sufisiente.
“Atu haruka oan sira ba eskola mós ha’u nia kbi’it la to atu dudu oan sira ba eskola ha’u nia katuas ona mate tinan kotuk ha’u mesak de’it ho oan sira feto faluk labele halo buat ida, osan atu hola hahan mós araska, sorti haki’ak netik animal hanesan bibi, manu no fa’an aisunu, ne’e mós lato’o nafatin, se hetan uituan maka sosa fo’os no uituan ba oan sira nia estudu,” dehan Inan faluk.
Entretanru, Alberto Soares dos Santos (matebian) ho Izabel Soares Vieira 59 iha oan na’in hitu kompostu husi feto haat, mane tolu, husi ne’e feto na’in rua maka remata ona sekundaria maibé lakontinua ba univesidade tanba ekonómia la suporta, dadaun sei kontinua maka Anapaula Rodrigues, segundu anu iha eskola Sergio Vieira de Melo, hela iha aldeia metin, suku lahane oriental, postu-administrativu Kristu Rei, Munisípiu Dili.
Estajiadu : Tome Exposto
Asisten Editor : Pedro de Almeida
