Lafaek News-Ministru Finansas (MF) Rui Gomes husu ba sidadaun hotu-hotu tenke kontribui ba rekoperasaun ekonómia iha Timor-Leste (TL).
“Mai informa ba Primeiru Ministru Taur Matan Ruak, katak ezekusaun orsamental mós hahú tiha ona iha semana kotuk, purtantu buat hotu iha kontrolu nia okos ne’e di’ak hela. Ha’u so apela de’it ita hakmatek hodi kontribui hamutuk para atu rekopera ita nia ekonómia atu bele halo moris sosiedade di’ak liu tan,” dehan Ministru Finansas (MF), Rui Gomes, ba jornalista sira hafoin enkontru ho PM iha palásiu governu, Segunda, (18/01/2021).
Nune’e, liga ho ezekusaun oresamental governu aprova regra ezekusaun Orsamentu Jerál Estadu (OJE) iha loron 11 Janeiru 2021.
Iha biban ne’e mós, Ministru Finansas informa servisu MF nian ba xefe governu Taur Matan Ruak, katak jestaun bazikas funsiona.
“Mai atualiza de’it servisu ba Primeiru Ministru Taur Matan Ruak, fó hatene de’it katak sistemas informatikas jestaun finansas publikas la’o ho di’ak,” dehan Rui.
Antes ne’e iha loron 28 Dezembru 2020, Prezidente Repúblika (PR) Francisco Guterres ‘Lú-Olo’ promulga OJE 2021 ho montante $1,895, foti husi reseita hosi fundu petroliferu biliaun $1,377 no resita naun petrolifeiru milaun $508.
Nune’e mós, governu relata ona katak, elaborasaun Orsamentu Jerál Estadu (OJE) 2021 baxeia planu rekoperasun ekonómia.
Iha OJE 2021, governu prevee millaun $123,9 ba pakote rekuperasaun ekonómika, ho objetivu hasa’e empregu, investe nafatin iha kapital sosiál nomós promove setór produtivu sira hodi bele kontribui ba kresimentu ekonómika iha rai laran.
Jornalista : Pedro de Almeida
Editór : Floriano Soares
