Husi Diretor Prizaun Becora, João Domingos
Lafaek News – Festa Natal lori ita hanoin katak Maria ho Jose ne’e koopera ho Maromak nia planu hodi hasoru desafios saida deit iha sira nia moris. Laiha provasaun ida nebe boot liu ita nia kbiit, tan provasaun hanesan dalan ida hodi hamos an ka purifica. Ita dala barak la fo tempo ba Maromak atu sai nain ba ita nia moris, ita nia hakarak nebe barak liu dala barak halo ita lao sala dalan. Nunee, Virgem Maria hanorin ita atu bele fo resposta iha ita nia moris mak “FIAT FOLUNTAS TUA” katak halo tui Ita Boot nia hakarak.
Natal no fim do ano iha fatin ida ne’e nudar provasaun nebe boot. Balu halao ona tinan barak maibe, balu foin mak halao. Ne’e exige fuan boot hodi simu realidade. Ida nebe haloa moris iha tempo susar, nia sei fo valor liu ba moris hodi respeita mos ema seluk nia moris.
Fatin ida nee tenki sai fatin arrependimento, atu ida-idak rekonsilia nia an rasik hodi husik o nia hakarak rasik, husik o nia prazer atu fo biban ba ema hotu atu bele haksolok iha moris ne’e. Keta hadau ema seluk nia moris, keta hadau ema seluk nia ksolok, tan wainhira o hadau, laos o atu manan no rai nudar riku soin wain ba o maibe, o sei lakon liu tan. Hanoin ba katak, natureza nia furak nebe oferese gratuita ba o mos, o sei susar atu hetan. Laiha ona ba o loro matan-monu no Laiha ona ba o fitun kalan. O subar ona husi natureza nia furak maibe, natureza hein hela o hodi hamaluk nafatin o maski o matan la hare. Hanesan mos sakrificio domin familia nian nebe lori sira nia domin iha minuto balu nia laran atu o bele forsa nafatin. Sira iha nafatin ba o, maski o la marka presenza iha sira nia moris.
Maluk populasaun sira hotu be iha ne’e.
Hau fo hanoin, maibe atu halao moris ne’e, o rasik mak sei deside. Wainhira ohin, o arrepende ba o nia passado, moris foun hein hela o. Maski ema dehan PENYESALAN ITU SELALU DATANG TERLAMBAT, maibe ohin, hau dehan ba imi hotu katak TIADA KATAK TERLAMBAT BAGI HATI YANG INGIN BERTOBAT, DI SINI DAN SEKARANG. Tempo too ona atu fila o nia fuan, tempo too ona atu dehan lae ba violência. Tempo moris nee badak demais maibe o la fo biban atu haksolok hamutuk ho familia no ema hotu nebe o hadomi. Se o hadomi sira hotu nebe iha uma, preciza kompromete ba an hodi halao regulamento hotu no prepara an didiak atu bele reintegra fali ba sosiedade. Ema nebe soi ba moris mak ida nebe hatene arrepende no fila fali ba dalan los. ELES ESTÃO A ESPERA A VOSSA PRESENÇA NO PRÓXIMO NATAL, sira hein hela imi nia presensa iha Natal sira tuir mai. Se o hadomi sira, arrepende ba. Tan o nia moris laos ba deit o nia an maibe, o nia moris husi sira no fila fali nia ba sira. Arrependimento hodi muda hahalok mak sei lori o fila hodi hakuak sira hotu iha o nia uma rasik, uma nebe o husik hela iha tempo naruk nia laran nebe ohin halo o saudades.
