Lafaek News-Governu liu husi Ministeiru edukasaun Joventude no Desportu (MEJD), deside ona suspende aktividade eskola iha Munisipiu Dili durante semana rua nia laran, tanba númeru covid-19 iha Dili sa’e maka’as.
Ministru Edukasaun Joventude no Desportu (MEJD), Armindo Maia, hateten, desizaun suspende aktividade eskola iha munisipiu Dili ne’e tanba bazeia ba númeru covid -19 sa’e maka’as iha munisipiu Dili liu-liu ba eskola lubuk ida, ho ida-ne’e tenke foti desizaun, nune’e bele prevene pandemia ne’e da’et.
“Ami mós lakoi foti desizaun ida -ne’e maibe situasaun obriga ita atu foti desizaun ida ne’e tanba ita lakoi labarik sira da’et husi familia ba to eskola da’et fali ba ema seluk ,tanba eskola ida mak deteta pozitivu covid-19 na’in 50 iha eskola ida mak ne’e, ha’u labele hatete eskola ne’e nia naran maibe eskola ne’e iha Dili laran,” dehan Armindo Maia ba jornalista sira iha Palasiu Governu kuarta,(18/08/21).
Enkuantu governante ne’e hatutan, suspensaun aktividade eskola ne’e hahú husi loron 17 to’o loron 31 agostu, depois ida ne’e mak sei haree fila fali situasaun oinsa mak bele hahú fali hodi realiza ezame segundu periodu, maibé iha eskola lubuk ida mak hala’o tiha ona ezame segundu periodu.
Jornalista : Etelvina Sarmento
Asisten Editora : Juvita dos Santos
