Lafaek News—Ministériu Edukasaun ME liu hosi Gabinete Relasaun Publika no protokolu, sesta (08/05/2025), hala’o workshop ho jornalista sira hodi fahe informasaun relevante kona-ba enkuadramentu jurídiku iha area edukasaun.
Diretór Relasaun Públika no Protokolu Ministériu Edukasaun, Olandino Godinho Sequeira, esplika workshop ne’e hanesan oportunidade atu jornalista sira hetan informasaun kona-ba sistema edukasaun no rejime legál aplika ba edukasaun ho nune’e fasilita serbisu jornalista hodi hetan informasaun ne’ebé loos tuir regra no prosedimentu aplikável.
“Workshop ne’e hanesan oportunidade atu jornalista sira hetan informasaun kona-ba sistema edukasaun no rejime legál aplika ba edukasaun hodi nune’e fasilita serbisu jornalista hodi hetan informasaun ne’ebé loos tuir regra no prosedimentu aplikável. No Liu Hosi Workshop ne’e oportunidade ba jornalista atu husu klarifikasaun kona-ba kestaun balun relevante ba prosesu iha área edukasaun,” Olandino Godinho Sequeira ba jornalista sira iha salaun media Ministériu Edukasaun, Vila-Verde Dili.
Entretantu Tuir lei baze edukasaun idade atu tama ba ensinu báziku mak tinan 6, ne’ebé kompleta iha tinan molok hahú eskola, ho nune’e idade loloos mak labarik tama ho otas 6 no halo tinan 7 iha klase 1.
Iha biban ne’e Orador prinsipal ba workshop Bárbara Oliveira, nu’udar fasilitadora no jurista apoiu iha Gabinete Jurídiku Ministériu Edukasaun esplika katak molok determina se falta ka lae profesór, tenke haree eskola nia kuadru pesoál.
“Kuadru pesoál mak hanesan instrumentu ne’ebé determina profesór hira mak eskola ida presiza, númeru profesór depende ba eskola nia nível ensinu, kurríkulu no karga orária no mós númeru estudante no númeru turma, Ministériu Edukasaun aprova ona kuadru pesoál ba eskola ensinu báziku no pré-eskola públiku hotu-hotu iha tinan 2024,agora sei besik atu aprova kuadru pesoál ba eskola ensinu sekundáriu,” Bárbara subline.
Barbara Oliveira, argumenta, dala barak eskola seidauk toman atu uza kuadru pesoál tanba buat foun no sei presiza tempu uitoan atu eskola rasik bele hatene jere sira-nia rekursu umanu tuir kuadru pesoál.
bolsa kandidatu halo tuir nível ensinu, no iha tinan 2024 halo Bolsa Kandidatu ba Pré-Eskolar no siklu 3 ensinu báziku ne’ebé agora la iha ona tanba koloka kandidatu sira hotu, agora sei iha hela Bolsa Kandidatu ba siklu 1 no 2 Ensinu Báziku ne’ebé depois koloka ona iha momentu rua sei hela ho kandidatu 1 259, ho feto 766, tuir publika liu hosi Despaixu Ministeriál nú. 05 /2025 de 13 de fevereiro.
Tuir informasaun Ministériu Edukasaun iha fulan Maiu ne’e sei halo xamada ba 150 resin kandidatu iha Bolsa Kandidatu atu taka vaga ne’ebé mai hosi dosente mate no reforma, ho reforma obrigatória ne’ebé aprova ona, iha espetativa katak sei halo xamada ba kandidatu kuaze hotu iha Bolsa Kandidatu atuál ba ensinu báziku siklu 1 no 2 iha tinan 2026.
Jornalista : Maria Jose
