Lafaek News—Kuarta (14/04/21), material asisténsia emerjénsia tonelada 27 resin, inklui materiál preparasaun hahán, materiál tenda no mós ijéniku to’o ona iha Aeroportu Internasiónal Nicolau Lobatu Dili, tuku 2 (otl) ho Aviaun Boeing Royal Australian Air Force C-17 Globemaster.
“Materiál hirak ne’e hola parte ba Austrália nia pakote asisténsia emerjénsia ho montante AUD millaun 7 ba Timor-Leste depoiz de inundasaun iha tempu Páskua foin dadauk ne’e iha Timor-Leste. Ekipa Asisténsia Médiku Austrálianu nian ida (AUSMAT) mós halo viajen tuir aviaun ida ne’e,” esplika Peter Roberts ba jornalista sira iha aeroportu Inernasiónal Nicolau Lobatu Komoro Dili, Kuarta (14/04/2021).
Nune’e, Epidomiolójista senior no ofisiál asisténsia saúde nian sei servisu hamutuk Ministériu Saúde nia ekipa vijilánsia ne’ebé da-daun ne’e jere responde ba COVID-19.
Nia hatutan, Materiál asisténsia emerjénsia nian sei distribui liu hosi Austrália ho parseria umanitária nia ONG sira.
“Ekipamentu Protesaun Pesoál (EPP) sei aumenta ba governu nia stock ne’ebé mak hetan estragus depoiz de inundasaun, ne’e hanesan kontinuasaun ba PPE kilo-grama 500 husi Austrália iha semana kotuk,” dehan nia.
Materiál asisténsia emerjénsia hirak ne’e aumenta ba Austrália nia apoia imidiatamentu ne’ebé fornese ona ema barak iha sentru evakuasaun sira.
“Austrália orgullu tebes hala’o serbisu hamutuk ho Governu Timor-Leste hodi apoia Timor-Leste nia esforsu hodi responde ba COVID-19 no rekuperasaun ba inundasaun,” tenik nia
Jornslista : Sandi Belo
Editór : Agapito de Deus
