Lafaek News—Família sira ho matan ben, simu mate isin Tomas Pereira, ne’ebé mate iha Tasmania Austrália tanba asidente iha loron 9 de Janeiru 2021, no ohin loron 16/02/21 reintegra ba familia.
Matebian ba servisu iha Austrália nu’udar traballador Sessional Worker Program (SWP), too iha aeroportu Internasional Nicolau Lobato iha tuku 8 :30, tula husi aviaun aviaun Airnorth.
Matebian Tomas Pereira nian inan rasik, Abita Soares.
Abita Soares, Inan husi matebian Tomas Pereira, hateten, nu’udar familia durante ne’e hatene de’it katak nia (matebian) ba servisu ho kondisaun di’ak, maibé fila mai ho kondisaun mate, maibé hanesan familia simu realidade tanba ne’e planu maromak nian.
“Ami nu’udar inan aman ami hatene katak durante ne’e nia ba serbisu ho di’ak maibé fila mai ho triste maibé ne’e planu maromak nian realidade ida-ne’e ami simu maske ho triste no fuan moras,”dehan Inan Husi matebian ho tanis, iha familia matebian nia uma Tasi-Tolu, 16/02/2021.
Nia hatutan, mate isin Tomas Pereira, ohin kalan sei hamutuk ho familia iha Dili Tasi-Tolu, no aban sei lori ba hodi haloot iha nia moris fatin Vikeke Lakluta tuir sira nia kultura.
Matebian nia Inan lori familia tomak hatoo agradesimentu boot ba estadu Timor-Leste ho nasaun Austrália ne’ebé servisu hamutuk hodi lori hikas mate isin Tomas reintrega ba familia.
Sekretariu Estadu Formasaun Profesionál no Empregu (SEFOPE) Alarico do Rosario, haktuir prosesu mate isin foin to’o ohin tanba kestaun transporte no mos situasaun Covid-19 ne’ebé oras ne’e afeta mundo tomak
“Ita hotu hatene katak ita nia alin Tomas Pereira ne’ebé hetan asidente iha loron 9 f janeiru 2021, iha Tasmania Austrália, nia prosesu tebes ohin foin to’o mai ohin iha Timor-Leste ho razaun tanba situasaun Covid-19, tan ne’e mak prosesu ne’e naruk la halimar regras sira iha Austrália nian difisíl tebes no mos ita laiha transporte hodi lori nia mai, ne’ebé ita laran metin de’it ba Australia ho Indonezia,”dehan SEFOPE, hafoin akompaña mate isin Tomas Pereira iha Aeroportu Internasional Nicolau Lobato Dili.
SEFOPE ne’e hatutan, kronolójia husi asidente ne’e matebian lori rasik karreta no matebian la kontrola velosidade konsege sai husi estrada rezulta matebian monu sai husi karreta ikus afeta nia mate.
Jornalista : Egidio Nono
Editora : Nelya Barros
