Lautém-(Lafaek News)—Komandu PNTL Munisípiu Lautém simu ona pedidu ezaminsaun hodi kee hikas mate isin, Regina Mendes, ne’ebé deskonfia oho husi laen rasik iha aldeia Ira-ara suku Kom postu administrativu Lautem, munisípiu Lautém iha loron 22 janeiru tinan ne’e.
Komandante PNTL Lautem, Superentendente Antonio Rego. LN CE. Lautem.
“Komandu PNTL munisípiu Lautém simu mandadu karta husi Ministeriu Públiku too ona iha komandu munisípiu hein de’it lori mate isin ba autopsia,” katak Komandante PNTL Lautem Superentendente, Antonio Rego ba Lafaek News iha nia kna’ar fatin, segunda (16/02/21).
komandante PNTL Munisípiu Lautém reforsa katak prosesu investigasaun ba kazu ne’e konklui ona porsentu 75, no hein de’it lori mate isin ba autopsia hodi konklui prosesu refere.
Komandante PNTL Lautém, haktuir istória kona-ba mate ne’e katak fo-foun kazu ne’e akontese hanesan susidu pesoal oho an, familia sira esplika bainhira polísia hakbesika an ba sira hateten matebian mak oho rasik nia an.
“Familia sira presta deklarasaun rekruta hodi halo prosesu autopsia, depois ita dezenvolve tiha kazu ne’e iha 1 de febreiru 2021, ita halo tiha investigasaun ita hetan husi komunidade ba servisu informasaun polísia no ita notifika tiha ema sira ne’ebé deskonfia involve iha kazu ne’e,” katak nia.
Tuir Antonio Rego katak, sásin balu deklara katak kazu ne’e husi susidu sai fali ba omesidu agravadu, da-daun ne’e halo ona prosesu ba ministériu públiku (MP), inklui halo ona pedidu atu kee fali mate isin lori ba autopsia.
Komandante ne’e salienta, mate isin Regina Mendes idade 40, da-daun seidauk kee no hein hela mandadu bele kee ona hodi lori ba autopsia atu sai hanesan provas hodi kondena suspeitu,
“Suspetu ne’ebé mak deskonfia hanesan laen rasik ho inisiál AR mak halo aktu asisinatu ne’e,” haktuir komandante PNTL Lautém ne’e.
Iha akontesimentu ne’e polísia munisípiu Lautém, liu husi polísia VPU asegura ona matebian nian oan na’in iha uma mahon, tanba kondisaun trauma, komandu mós iha ona pedidu.
“Ezaminasaun iha ona ita nia liman agora ita sei hein, tempu tuir mai sei liga mós ba Forensik nasionál oinsá ita atu lori mate isin ba halo autopsia,” komandante PNTL ne’e hakotu.
Jornalista : CE. Lautem
Editora : Nelya Barros
