Lafaek News—Ministériu Agrikultura no Peskas (MAP) kompremete iha futuru uza mákina ne’ebé estudante Universidade Oriental Timor Lorosa’e (UNITAL) produs, nune’e hamenus produsaun husi rai liur.
“Ami halo ona konsultasaun ho parte akadémika tanba iha futuru automatikamente ita sei uza produsaun makina iha rai laran, ita lalika halo tan akizasaun ne’e halai liu ba rai liur, ita promove ita nian, liu-liu parte UNITAL ne’ebé máka halo produsaun ona,” dehan Assesor Tekniku Floresta Politika Programa José Celestino ba lafaek news iha Unital foin lalais ne’e.
Nia fundamenta, ojetivu servisu hamutuk ho universidade UNITAL ne’e ho razaun ida katak produsaun makina ne’e atu fó duni benefisiu ba povu agrikultor sira, no dalan ida máka atu hamenus importasaun.
“Ida ne’e máka ita presija hadiha hare’e liu ba produsaun, hodi apoiu ba programa governu nian, tanba ha’u hare’e makina ne’e praktis liu, tan ne’e sei kopera di’ak ho universidade para kontinua produz para proposta husi povu agrikultor sira mai ita apoiu,” nia infórma.
Nia dehan, parte MAP hare’e liu ba nia kualidade, kuantidade no presu, maibé atu hadia di’ak liután sei lori ema tékniku envolve direta, tanba programa MAP garante sei tau iha planu OJE 2022.
Enkuantu iha sorin seluk Dekanu Fakuldade Tékniku Juvinal Ximenes Guterres, nia parte orgullu sei garante kualidade, tanba futuru Ministériu Agrikultura no Peskas presija atu nune’e bele fasilita agrikultór sira hodi halo servisu.
“Ami halo apresentasaun ba ministériu agrikultura no peskas, sira tau duni atensaun ba makina hirak ne’e, tanba ami garante sei halo barak liu tan makina ne’ebé liga ho nesesidade povu agrikultór sira atu hafasil halo servisu ho lais,” hatete Dekanu.
Orsamentu ba produsaun makina ne’e mai husi estudante rasik tanba liga ho sira nia teze, iha dezafius mós esforsu tenke remata, apoiu mós husi universidade, no estudante ne’ebé tama ona faze estájiu sei kontinua produs tanba ida ne’e atu determina sira nia estudu, inklui kontribui mós ba estadu atu tulun povu agrikultór sira ne’ebe presija.
Entretantu da-daun ne’e produsaun makina dulas nuu 2, press nuu 2, kompor gas 1, loke batar 1, biu batar 1, dulas kaffe 1, solar panel 1, baku hare 1 no balun sei iha prosesu nia laran, no planu ba oin estudante hamutuk dosente sira kontinua produs makina ne’ebé bele ajuda povu agrikultor sira inklui makina hamos barajen, makina kua hare.
Jornalista : Pedro de Almeida
Editór : Agapito de Deus
