Lafaek News–Adino Marques aileba oan husi postu administrativu Reméxio, munisípiu Aileu, fo hanoin maluk foin sa’e sira iha Timor Leste, se bele karik hatoman an halo negosiu hodi muda moris husi kiak ba ambiente ekonomia ne’ebé iha sustentabilidade másimu.
Adino Marques nu’udar Joven ne’ebé hala’o servisu aileba tatulak iha kbaas-leten husi loos troka ba karuk hakur rai manas husi rai no loron la’o iha sidade Dili husi lidun ida ba lidu seluk hodi buka osan sustenta nesesidade uma-laran no ajuda inan-aman selu alin sira nia eskola.
Adino hatais faru metan polos liman badak, kalxa badak kor ungu, tau sapatu mutin no taka sapeo polos kór metan, la’o husi diresaun Bebonuk ba ponte CPLP, hateke husi dook dada iis ho hafalun ho kosar metan suli, molok too iha ponte Adinu hili dalan liman loos leba nia sasan folin ba hamahan an iha ponte CPLP okos hodi hein ema sira ne’ebé hakarak sosa nia produtu local hanesan kinur ho aifuan jambuar.
Sasan ne’ebé fa’an ne’e produz rasik husi uma mak mai fa’an iha Dili ,no nia rezerva iha uma mos iha kuase mai fa’an fulan ida (1) lae (2) mak foin fila ba aileu lori tan fali mai.
Ha’u fa’an husi dader to’o loraik ,loron ida ha’u hetan lukru US 30 dollar no osan ne’ebé ha’u hetan ha’u rasik uza ba ha’u nia an karik inan aman presisa entaun ha’u fila ba aileu ha’u fo hela sira la barak maibe agradese oituan- oituan ne’e iha .Sasan ne’ebé ha’u fa’an mak hanesan kinor no aifuan sira no sasan ne’e ami rasik produz iha aileu mak lori mai fa’an iha ne’e.”Hateten Adino Marques ba jornalista iha Ponte Komoro, kinta (25/08/2022).
Molok Adino lori produtu kinur ho aifuan jambuar mai fan iha Dili, más antes ne’e Adino halo toos iha Reméxio munisípiu Aileu kuda produtu local hanesan modo mutin, kankun ho nanas, buat ne’ebé nia halo la’os ema ida mak haruka, maibé husi ida ne’e mak hatoman Dino oinsá halo servisu hanesan agrikultor, servisu todan no servisu hanesan atan, maibé han hanesan ema liurai.
Ha’u para eskola iha klase 4 tanba ha’u nia inan aman kbiit laiha atu sustenta ami oan sira nia eskola ho ida ne’e mak ha’u para iha eskola no ajuda fali inan aman halo modo atu fa’an fali hodi sustenta fali ami nia moris loron-loron ,iha uma laran ami hamutuk nain sia (9), feto neen (6) mane rua(2) ,ha’u nia alin mane ida mak agora eskola iha Remexio klase 6 seluk la eskola halimar de’it no balun hola ona feto no balun hola mane ona,” katak Adino.
Bainhira dada lia ikus nian, Dino hatoo nia mensajen ba maluk joven sira labele baruk-ten, no tane liman bei-beik ba iha inan-aman, no labele laran moras ema seluk nia kosar-ben, tau an hanesan povu aileba oan hodi buka moris sustenta uma laran no ajuda alin sira nia eskola hodi kontribui ba prosesu dezenvolvimentu iha setor rekursu umanu nian iha future.
Estajiada : Aldina Guterres
Editor : Agapito de Deus
