Lafaek News—Francisco neon metin de’it ho supermie falun rua be haloot seguru iha baldi laran atu asegura kabun ba loron ida ka rua nian atu bele buka fali aihan seluk subtitui moris ba loron tuir mai.
Francisco Pereira da Silva 42, moris hanesan faluk hela iha aibubur-laran foho leten aldeia Lemorana suku Dare postu-administrativu Vera-Krus munisípiu Dili, moris hamaluk ho balada fuik sira lian hahanu hodi anima nia iha atividade lor-loron.
Francisco moris mesak iha aibubur laran foho leten dook hosi bee no eletrisidade, bainhira iha oras kalan hamrik iha foho leten hateke ba sidade Dili naroman ho eletrisidade no hateke fila ba nia uma baraka naroman ho lampu tradisional, hakat fila tuur iha hadak-leten ne’ebe besik uma barraka oin tuur hodi hanoin bainhira uma barraka ne’e bele sai uma di’ak no eletrisidade bele lakan hanesan iha Dili laran.
Nesesidade uma laran sai hanesan turbulensia (impediementu) ba Francisco, hadia uma barraka ne’ebe falun ho kalen fruzen no karon mamuk, la’o tama sai ailaran buka kulu nurak ho ai-farina tahan leba tun sidade Dili fan hodi sosa fali foos dolar 2 nian lori ba uma tein sasoro hodi sustenta moris lor-loron.
“Ha’u ema ai-leba faan ai-sunu ho kulu, maibe haree kulu iha mak ba fan no ai-sunu ema hamenu mak hau’ lori tun ba, se ema la hameno no kulu ne’ebe seidauk fuan ha’u la hetan osan no ha’u laiha hahan atu han,’’ haktuir Francisco Pereira da Silva ba lafaek news iha foho leten aibubur-laran Lemorana, kuarta (26/08/2021).
Uma ne’ebe Francisco hamahan an ba dook husi bee-matan, tenke la’o metru atus rua resin (200-M), hafoin bele kuru bee moos, masa kuru bee laiha, bee mos enxe iha aqua hodi utiliza ba nesesidade uma laran.
Moria depende liu ba ai-maran, ai-farina tahan no kulu nurak, sorti di’ak loron ida hetan dolar 5, maibe tenke la’o husi dadeer too lokraik haleu sidade Dili hafoin hetan osan ne’e hodi sosa foos lori ba uma.
“Sorte di’ak loron ida ha’u bele hetan dolar $.5 osan ne’ebe ha’u hetan ne’e ha’u sosa hahan ruma hodi kalsu hau nia hamlaha, no sosa Mina rai atu sunu iha kalan hodi fo naroman mai ha’u iha tempu kalan,”hatete Francisco.
Iha entrvista ho lafaek news, Francisco haktuir nia sei maun alin ho saudozu Bispu Ricardo da Silva, sira nain rua aman maun alin rasik, Francisco nia aman rasik nia alin mak matebian Bispu Ricardo da Silva.
“Ha’u nia aman Afonso Pereira da Silva ho nia kaben Alda da Silva hakotu nia iis iha Ermera tinan kotuk liuba, ohin loron atu hasai Koremetan, maibe dalan taka entaun ha’u labele ba hasai ha’u nia inan nia koremeta, ami hamutuk nain 5 feto 4 no mane 1, feto hola mane hotu ona ema Humboe, ha’u lakohi hola feto tanba ha’u serbisu laiha ha’u atu fo han saida hola feto hanesan de’it.” haktuir Francisco
Dala ruma, Francisco trieste tanba moris mesak-mesak, nia so ko’alia bainhira ema ruma hameno aimaran futun ida, dook ka besik tenke pasiensia leba ai-maran too, tanba ema presiza ai-sunu, maibe bainhira fila ema na’ok hotu manu, fahi no bibi ne’ebe nia hakiak iha aibubur-laran.
“Ha’u moris mesak hanesan ne’e ha’u sente triste, ema hameno ai-sunu ha’u lori tun no faan kulu hodi buka hahan kalan nian,mai animal ne’ebe hau hakiak, mak fahi ,bibi,no manu ema na’ok hotu entaun agora ha’u laiha buat Ida atu hakiak, hau iha relasaun ho amu bispo Ricardo ami hanesan maun alin, amu bispu nia papa ho hau nia papa maun ho alin aman kiik aman boot aman boot mak bispu Ricardo no aman kiik mak ami,’’ haktuir nia.
Francisco dehan buat hotu di’ak, tanba ema sira mate ona la sente ona saida mak agora nia sente, uma at, eletricidade laiha, hahan laiha no bee laiha, ida ne’e mak terus iha mundu bainhira moris hanesan ema kriatura.
Vizita lafaek news iha Francisco tempu too ona nia rohan, nia hameno atu ema ruma bele ajuda hadia nia uma, no instala netik eletrisidade ba uma atu bele halakan iha oras kalan, halo etik haris fatim ruma, tanba nia laiha forsa intermus de finanseiru atu bele sosa semente, sosa fiu no sosa mos aihan.
“Ha’u seidauk hetan apoiu husi estadu no ema seluk ha’u mak buka rasik no hanoin atu dada eletrisidade mai, maibe ha’u nia osan mak seidauk iha,” katak nia.
Iha fatin hanesan, inan faluk Santina Conceicao, mos haktuir kona-ba kondisaun moris Francisco Pereira, laiha aihan, hanesan vizinu dala ruma bolu nia oferese netik aihan bikan ida, dalaruma etu maran de’it.
“Ami rua hela besik malu, tanba sei familia hanesan feton ho maun, dala ruma hau bolu nia fo etu maran bikan ida, tanba nia laiha foos, dala ruma ami rua han sasoro de’it, tanba modo laiha, osan iha ne’ebe atu sosa, han sasoro mos pasiensia de’it ona,’’ haktuir avo Santina bainhira ekipa jornalista lafaek news vizita iha hela fatin iha Aibubur-laran aldeia Lemora suku Dare.
Inan faluk Santina haktuir, iha tempu di’ak bainhira nia oan feto (madre) lori foos, mina, kafe no masin midar mai maske tuan, hafoin bele fo Francisco nian uituan, dala ruma bolu mai hemu hamutuk
“Ha’u labele han hemu mesak, maske ha’u distansia ho nia maibe ha’u la haluha bolu nia mai han etu maran bikan ida hodi tahan netik nia kabun,” espresa inan faluk ne’e.
Estajiada : Crisencia Ferreira
Editor : Agapito de Deus
