Lafaeknews-Komandante Jerál Polisia Nasionál Timor Leste (PNTL), Komisáriu Faustino da Costa, hateten, lafasil PNTL implementa Serka Sanitária hodi taka pontu entrada ba komunidade sira hodi tama no sai husi kapitál Díli, tanba iha dalan klandestina hodi fasilita komunidade sira halai sai hosi Dili ba munisípiu.
“Ha’u hanoin buat ida ne’e la’ós fasil, tanba ita taka iha dalan boot maibé ai-laran no foho leten ne’e sai prekupasaun, entaun ema balu bele halai liuhosi ai-laran no foho leten hodi ba munisípiu,” informa KOMJER Faustino ba jornaliata sira iha Sentru Saúde Formoza Dili, Kuarta, 07/04/2021.
Nia dehan, kuaze munisípiu hotu hanesan de’it tanba populasaun balu la’o ses hosi dalan boot hodi viajen ba munisípiu, maibé atu dehan de’it PNTL nafatin halo nia papél hodi implementa orden ne’ebé governu estabelese tiha ona.
KOMJER Faustino afirma, maski governu implementa Serka Sanitária iha Dili, maibé iha meius seluk hodi bele fasilita komunidade sira atu bele sai husi Dili ba Munisípiu, tanba ne’e husu atu bele la’o tuir rekezitu sira ne’ebé estabelese tiha ona.
“Husu ba populasaun iha Dili laran atu ba munisípiu ne’e iha prosedur. h alo swab, ninia objetivu atu garante ita la bele lori moras ne’e ba iha munisípiu, postu, suku no aldeia,” nia fó hanoin.
Nia afirma, polisia sira sei kontrola tuir rekursu ne’ebé iha, tanba ne’e komunidade sira mós labele hanoin kestaun ne’e responsável polisia nian mesak atu asegura, maibé ema hotu tenke kontribui katak ninia família iha aldeia no suku tenke livre hosi moras COVID-19.
Enkuantu líder PNTL ne’e mós salienta liután, membru PNTL balu ohin tuir ona programa governu nian hodi halo ona vasina, tanba ne’e husu atu komunidade labele preokupa ho informasaun ne’ebé fó sirkula iha mídia sosiál.
“Ohin ha’u rasik halo ona vasina no membru PNTL balu mós halo ona vasina, tanba ne’e la bele preokupa sirkulasaun informasaun iha mídia sosiál maibé ita rasik tenke buka informasaun ne’ebé loloos núne’e ita mós bele hola parte iha vasina,” dehan nia.
Jornalista : Orlando Magno
Editór : Lino Aparicio
