Lafaek News–Faluk Mariazinha dos Santos husi munisípiu Lautem, laiha kbiit finansa atu responde nesesidade uma laran, nia halo negosiu kiik fan katupa ho dosi hodi responde moris loro-loron no suporta oan sira nia eskola, maibé laiha forsa atu hadia uma ne’ebé komesa dodok husi kakuluk.
Mariazinha hateten, ukun nain sira presiza tur hautuk diskute povu nia moris, tanba povu rasik hili ona reprezentante povu hodi hatoo povu nia lian susar terus sira iha uma fukun parlamentu nasional hodi hatoo ba governu liu husi ministeriu kompetensia atu bele buka solusaun, maibé haluha interese povu defende interese privadu hodi sakrifika povu kiik iha baze.
Inan faluk Mariazinha dos Santos haktuir nia terus katak durante Timor ukun-an ne’e nia fan sasán hodi sustenta moris ho oan sira iha eskola ensinu báziku filiál rua iha Lospalos-vila hodi hetan netik osan ba moris oan nain 3 ninia eskola.
Ha’u fan sasán sira ne’e tanba ha’u nia oan nain haat ida primeiru la eskola ona nain tolu sei eskola agora nain rua tur ona iha sekundáriu jerál no ida sei iha ensinu báziku filiál quatro ano, Ha’u fan sasán iha ne’e hahu husi Timor ukun-an mai to agora, ha’u nia oan sira bele hetan susar, tanba ha’u mak tenke buka osan ba sira labarik sira nia apa mate ona tanba ne’e ha’u mak tenke buka osan fo ha’u nia oan sira hodi han no ba eskola,” katak inan faluk ne’e ba lafaek news iha merkadu Lospalos vila foin lalais ne’e.
Ligadu ho nesesidade moris faluk ne’e nian, nia rasik deside ba hasoru Ministériu Solidariedade Sosiál no Inkluzaun munisípiu Lautém, maibé laiha rezultadu ruma, nune’e kontinua de’it sasan iha merkadu, maibé rendimentu loron ida la too dolar 5.
Ha’u ba dala rua ou tolu ona iha ministeriu solidaridade sosial atu husu tulun ruma ba ha’u ho ha’u nia oan sira maibé sira dehan laiha nune’e ha’u hili dalan fan sasán ha’u sei bele atende ha’u nia oan sira ba eskola no han hemu,’’dehan Mariazinha.
Bainhira jornalista lafaek news hakbesik ba too faluk Mariazinha ninia hela fatin haree direta uma ne’ebé inan faluk ne’e hela iha kuartu rua ne’ebé husik hela husi estadu Indonézia, maibé kondisaun la premite ona, odamatan taka de’it ho kalen aat no ladún iha kondisaun ne’ebé di’ak atu hela ona.
Ha’u ho oan nain haat nia uma laiha, ami laiha forsa atu halo uma foun tanba kada loron nia fan katupa ho dose ne’e de’it oinsá selu oan sira ba eskola nune’e mós hahán no nesesidade oan sira nian,’’katak Mariazinha.
