Lafaek News—Estadu Timor-Leste Ukun-an Tinan-20 resin tiha ona, osan barak tebes mak governu gasta atu hadi’a rai ida-ne’e maibé nia rezultadu mak povu maioria sei terus, estrada sei aat, bee sei nalihun, baleta sei aat, lixu kintu-kantu, rai-rahun suar fatin-fatin, má-nutrisaun sura la hotu.
Membru Forum Justisa Popular Timor Leste, hateten ihaa fulan-Agostu liubá, Administradór Munisípiu Kovalima ho komitiva implemeta Dekretu Lei nú.33/2008 kona-ba Higene no Orden Publiku iha Postu Adminstrativu Tilomar Munisipiu Kovalima. Sira Implementa lei ne’e la hodi hadi’a baleta-kuak, rezolve estrada-aat, bee-nalihun, lixu no fatin públiku seluk ne’ebé hetan estragus no fo amesa ba higene publiku. Maibé sira implemeta lei refere ho metodu haksoit lutu, hodi oho povu animál lubuk ida hanesan karau, bibi no konsege mós hakanek karau hosi komunidade balu.
“Susar hirak ne’ebé mak povu afeta, governu lokál la mosu mai hodi hadia povu sira nia terus maibé sira mai fali ho kro’at hanesan militar Indonezia iha ka ema aat sira iha tinan rihun ida – atus – sia – sianulu – resin – sia (1999 ) hodi harahun povu sira nia moris hanesan oho animal ne’ebé povu hakiak ho kosar – been no hodi fo nia oan sira eskola no balun sustenta familia uma – laran .” Katak Membru Forum Justisa Popular Timor – Leste ba jornalista Lafaek News iha Jardin 5 de maio , Colmera , Dili , Kuarta (12/10/2022) .
Aktu administrador Kovalima ho nia komitiva ne’ebé oho povu nia animál iha postu administrativu Tilomar, ne’e illegál! Tanba tuir lei higene publiku artigu-2, ambitu aplikasaun lei refere ba de’it sidade urbana. Tanba ne’e, aplika lei refere iha postu administrativu hanesan Tilomar, ne’e kategoria krime. Aat liu tan , iha Tilomar , karau no bibi ne’ebé sira oho iha fulan Agostu liu ba , estrega los de’it ba uma mahon no prizaun Salele .
“ Iha suku Lalaun aldeia Ai – Oan suku Maudemi iha karau hat (4) , karau rua (2) mate no rua (2) hetan kanek no sai fuik la tama fali iha nia luhan no iha mos bibi neen (6) ka hitu (7) ne’ebé mos mate . Animal ne’ebé mak sira oho sira la entrega fila ba aninal ne nia nain maibe sira lori fali ba tau iha uma mahon no prizaun Salele , ida ne’e hanesan krime violasaun ba komunidade Tilomar no Suai – Vila “ Nia hakotu .
Estajiada : Aldina Guterres/Adolfina Soares
Editor : Agapito de Deus
